Foto: N.Baıbýlın
Otyrys barysynda el Prezıdentiniń Joǵarǵy Sot sýdıasy laýazymyna saılaý týraly usynysyn Joǵarǵy Sot Keńesiniń Tóraǵasy Dmıtrıı Malahov oqyp berdi. Senattyń salalyq komıteti kandıdatýrany aldyn ala qarap, talqylaý nátıjesinde depýtattar Joǵarǵy Sot sýdıasy qyzmetine Denıs Shıppti saılady.
Sondaı-aq Palata otyrysynda «Bıologııalyq materıal almasý týraly kelisimdi ratıfıkasııalaý týraly» zań qaralyp, maquldandy. Atalǵan qujattyń normalary asa qaýipti aýrýlardyń zerthanalyq dıagnostıkasyn jetildirýge, mıkroorganızmderdiń (shtammdardyń) ulttyq kolleksııalaryn tolyqtyrýǵa jáne Kelisimge qatysýshy memleketterdiń aýmaqtaryn epızootııadan qorǵaýǵa baǵyttalǵan. Kelisimdi ratıfıkasııalaý TMD-ǵa múshe memleketterdiń janýarlardyń juqpaly aýrýlarynyń taralýyn bolǵyzbaý jáne osyndaı aýrýlardyń zerthanalyq dıagnostıkasyn jetildirý jónindegi kúsh-jigerin biriktirýge múmkindik beredi.
«Qaralǵan Kelisim janýarlardyń ınfeksııalyq aýrýlarynyń taralýyna qarsy is-qımyldyń tıimdiligin arttyrýdy kózdeıdi. Atap aıtqanda, taraptardyń asa qaýipti aýrýlardyń taralýynyń aldyn alý, anyqtaý jáne jolyn kesý jónindegi birlesken is-sharalary qarastyrylǵan. Maquldanǵan zań kelisimge qatysýshy elder arasynda veterınarııa salasyndaǵy yntymaqtastyqty odan ári damytýǵa óz septigin tıgizedi dep senemiz», dedi zań jóninde pikir bildirgen Máýlen Áshimbaev.
Qujat erejelerine sáıkes akkredıttelgen jáne referenttik zerthanalar men ortalyqtarda bıomaterıalǵa zertteýler júrgizý kezinde taraptardyń epızootııalyq ahýaly, sondaı-aq, ǵylymı múddeleri eskeriletinin atap ótken jón. Osylaısha, materıaldy irikteý, qaptaý jáne tasymaldaý halyqaralyq standarttarǵa, onyń ishinde Dúnıejúzilik janýarlar saýlyǵyn qorǵaý uıymynyń usynymdaryna saı júzege asyrylady. Kelisimge sáıkes alýshy bıomaterıaldy tıisti qorǵaý (bıoqaýipsizdik) júıesi bar óz zerthanasynda dıagnostıkalyq, monıtorıngtik jumystar nemese ǵylymı-zertteý jumystaryn júrgizý maqsatynda ǵana paıdalanady. Kez kelgen zertteý aıaqtalǵan soń alýshy osy zertteýlerdi júrgizý nátıjeleri týraly ónim berýshini habardar etýge mindettenedi.
Sonymen qatar otyrysta senator Gennadıı Shıpovskıh Úkimet basshysyna TikTok týraly depýtattyq saýal joldady.
