Sýretti túsirgen – Erlan OMAR, «EQ»
Oblystaǵy 492 380 daýys berýshiniń aldyńǵy leginde ýchaskege 103 jastaǵy soǵys ardageri Iаhııa Tasyrov aqsaqal jetip, tańdaý jasap, batasyn berip ketti.
«Alǵa tartqan ozady, keıin tartqan tozady» degendi burynǵylar tegin aıtpaǵan. Eldiń alǵa jyljýy birlikke baılanysty. Al birlik osyndaıda baıqalady. Sondyqtan da osyndaı naýqanda tańdaýymyzdy jasap, ortaq iske ún qosýymyz kerek», deıdi ǵasyr ǵumyr ıesi.
Tańerteńnen bastalǵan daýys berý tús aýa qyza tústi. Saǵat 16.00-degi kórsetkish boıynsha Qyzylorda oblysy el óńirlerinen kóp ilgeri turdy. Osy jolǵy daýys berýde azamattyq ustanymyn tanytýǵa jasy jetken 7 038 azamat alǵash ret tańdaý jasady. Qaı naýqanda da bereke-birligimen erekshelenetin óńir jurty bul joly da joldan taıǵan joq.
«Biz jastardyń boıyna bolashaqqa degen senim qalyptastyrýymyz kerek. Ondaıda úlgi bolyp jurt aldynda júrmesek, úlkendigimiz qaıda qalady. Men el erteńiniń budan da nurly bolaryna kámil senemin», deıdi Jańaqorǵan aýdany Jaıylma aýylyndaǵy «Jaıylma jaýharlary» ansambliniń múshesi Syrǵaly Turabaev.
О́ner ujymy da jubyn jazbaı kelip tańdaý jasap, eldi ónerimen súısintip ketti.
«Búgingi referendým keleli esti keńesin sheshetin dástúrimizdi taǵy bir tanytty. El pikirin eksheıtin sátten syrt qalý bárimizge syn bolar edi. Ár turǵyn osy daýys berýdiń el úshin mańyzyn túsinýi kerek», deıdi belgili qoǵam qaıratkeri Ibragım Ábıbýllaev.
Oblystaǵy barlyq ýchaske talapqa saı jabdyqtaldy. Daýys berý kúni Qyzylorda qalasynda – 16, aýdandarda 29 ınvataksı jumys istedi. Qajettilikke qaraı ýchaskelerde 48 ym tiliniń mamany qyzmet atqardy. Sondaı-aq 72 ýchaskede 105 azamatqa Braıl qarpimen jazylǵan trafaret qoljetimdi boldy.
Qyzylorda
