Foto: aikyn.kz
«Birtutas tárbıe» baǵdarlamasy aıasynda uıymdastyrylǵan baıqaýdyń aýdandyq irikteý kezeńine 5 myńǵa jýyq synyp jetekshisi qatysqan. Sonyń ishinde oblystyq kezeńge 312 pedagog joldama ıelengen. Qorytyndy respýblıkalyq kezeńde synyp jetekshileri ustazdyq qyzmetine qatysty prezentasııa usynyp, keıs sessııasynda pedagogıkalyq jaǵdaıattardy sheber taldaý daǵdysy synaldy. Bul kezeńnen keıin baıqaýǵa qatysýshylar shyǵarmashylyq jobalaryn qorǵady.
«Baıqaýdyń basty maqsaty – synyp jetekshileriniń áleýmettik mártebesin kóterip, tárbıe jumysyndaǵy ozyq tájirıbesin keńinen nasıhattaý. Osy baıqaý arqyly tárbıe jumysynyń tıimdi ádisteri men tehnologııalaryn anyqtaý jáne taratýdy kózdeımiz», dedi Tárbıe jumysy jáne qosymsha bilim berý departamentiniń dırektory Merýert Medetbekova.
Baıqaý nátıjesinde Pavlodar oblysy, Maı aýdanyndaǵy E.Muqashev atyndaǵy mekteptiń ustazy Ǵalamat Jańabek jáne Abaı oblysyndaǵy elektrotehnıka kolledjiniń oqytýshysy Shyńǵys Shynarbek úzdik synyp jetekshileri atandy.
Baıqaý qatysýshylaryna «Bala júregine jol tapqan ustaz», «Urpaq tárbıesindegi utymdy ıdeıa», «Shabyttandyratyn tálimger», «Ata-anamen yntymaǵy jarasqan», «Kreatıvti kóshbasshy» nomınasııalary da tabystaldy. Barlyq konkýrstyq qoıylymdarǵa ata-analardy pedagogıkalyq qoldaý ortalyǵynyń ata-analar qoǵamdastyǵynyń, sondaı-aq «Meniń baýyrym» jobasyna qatysýshylardyń ókilderi qatysty.
