Foto: egemen.kz
Ekologııa jáne tabıǵı resýrstar mınıstri Erlan Nysanbaevtyń dereginshe, Qazaqstanda keıingi 5 jylda orman alqaptarynyń aýdany 267 myń gektarǵa ulǵaıtylǵan. Sondaı-aq ormandy qorǵaý mekemelerin tehnıkamen qamtý, orman sharýashylyǵy qyzmetkerlerin áleýmettik qoldaý boıynsha sharalar qabyldanyp jatyr.
«Máselen, ótken jyly tehnıka men jabdyqtardy satyp alýǵa respýblıkalyq jáne jergilikti bıýdjetterden 15,9 mlrd teńge bólinip, 526 birlik órtke qarsy jáne patrýldik tehnıka satyp alyndy. Bıyl elimizdiń orman sharýashylyǵy tarıhynda alǵash ret 1384 birlik órtke qarsy tehnıka men 921 birlik tirkeme jáne aspa jabdyqtaryn satyp alýǵa 52 mlrd teńge, onyń ishinde lızıng esebinen – 40 mlrd teńge bólindi. Bul sharalar elimizdiń órtke asa beıim óńirlerindegi orman qorǵaý mekemeleriniń jaraqtandyrylýyn 100%-ǵa deıin jetkizýge múmkindik beredi», dedi Erlan Nysanbaev.
Elimizdegi 900 myń ga memlekettik orman qory orman órtterin erte anyqtaý júıelerimen qamtylǵan. Kelesi jyly 3,1 mlrd teńge somasyna osyndaı júıe «Semeı ormany» rezervatynda engiziledi dep josparlanyp otyr.
Mınıstrlikter men ákimdikterdiń 12 mekemesi atalǵan júıeni 24 mlrd teńge mólsherinde lızıngtik qarjylandyrý esebinen ornatady.
