Foto: flickr
Bıyl mınıstrlikke qarasty «Qazsýshar» mekemesiniń fılıaldary sharýa qojalyqtarymen sýarmaly sý berý jóninde 25 myńǵa jýyq kelisimshart jasasqan.
Mınıstrlik málimetinshe, tutyný turǵysynda kósh basynda Qyzylorda oblysy (3,7 mlrd tekshe metr) tur. Túrkistan aımaǵynyń sharýalary 3,4 mlrd tekshe metr sý alǵan. Jetisý oblysy dıqandaryna 1,37 mlrd tekshe metr sý berilse, Almaty oblysynyń sharýalary 1,57 mlrd tekshe metr sýdy paıdalanǵan.
«Úkimet tótenshe jaǵdaı men sýarmaly sý tapshylyǵynyń aldyn aldy. Biz byltyrǵy jaǵdaıdan tájirıbe jınap, sabaq aldyq. Osynyń nátıjesinde bıyl sharýalardy úzdiksiz sýarmaly sýmen qamtamasyz ettik. Sý dıplomatııasy da mańyzdy ról atqarǵanyn aıta ketken jón. Bıyl О́zbekstan, Qyrǵyzstan jáne Tájikstan elimizge bastapqyda boljanǵan kólemnen artyq sý jiberdi», dedi sala mınıstri Nurjan Nurjigitov.
Búginde vedomstvo tasqyn kezeńine daıyndyqty bastady. Soltústik, batys, shyǵys, ortalyq aımaqtaryndaǵy sý qoımalarynan sý jiberile bastady. Al ońtústik oblystardaǵy sý qoımalary kerisinshe, sý jınaý rejıminde jumys istep jatyr.
Ortalyq Azııanyń memleketaralyq sý sharýashylyǵyn úılestirý komıssııasynyń kelesi otyrysynda Naryn-Syrdarııa sý qoımalary kaskadynyń boljamdy jumys kestesi jasalmaq jáne kelesi jylǵa sý berý kólemi bekitilmek.
