Elimizdiń Ulttyq pavılony Mádenıet jáne aqparat mınıstrliginiń qoldaýymen alǵash ret bedeldi kórmede usynylyp otyr. Onyń komıssary – Mádenıet jáne aqparat mınıstri Aıda Balaeva.
«Jerūiyq» (Jeruıyq) mıftik jer týraly ejelgi ańyzdyń zamanaýı ınterpretısııasy kórmege kelýshilerdi tańǵaldyrǵany ras. «Sheteldikter barlyq jerde» atty kezekti Venesııa óner bıennalesine 90 eldiń sýretshileri qatysyp otyr. Kórmeniń negizgi tujyrymdamasy kóshi-qon, mádenı plıýralızm máselelerin jáne jahandyq Ońtústik elderden kelgen modernıstik sýretshilerdiń esimderin qaıtadan tanystyrady.
«Jerūiyq» – búginge deıin aýyzdan-aýyzǵa tarap, urpaqtan-urpaqqa jetken qazaq ańyzy boıynsha «qutty mekendi» izdeý. Ekspozısııada fýtýrıstik kókjıekter men qazirgi portaldan bólek ólshemge deıingi qııal álemi usynylǵan. Qazaq sýretshileriniń týyndylary taqyrypty birneshe býyn turǵysynan kórsetý úshin muqııat iriktelip alynǵan: HH ǵasyrdyń 70-80-90 jyldarynda qalaı qabyldanǵany, ony jańa medıamen jumys isteıtin zamanaýı sýretshiler qaıtadan bastan keshirgeni kórinedi.
«Qazaqstanǵa óz ónerin kórsetý óte mańyzdy. Tarıh pen qazirgi zamandy ushtastyrý ıdeıasy men tujyrymdamasy qyzyqty jáne maǵan unady», dedi germanııalyq art-synshy ári sýretshi Valerııa Abentrot.
Qazaqstan pavılonyn kópshilik jyly qabyldady. Oǵan pavılonnyń biregeı tujyrymdamasy men sýretshilerdiń urpaqtar sabaqtastyǵy baıqalatyn erekshe jumystary sep boldy. Máselen, ótken onjyldyqty beıneleıtin Kamıl Mýllashev pen Erbolat Tólepbaıdyń jumystary, Sáken Narynov pen Sergeı Maslovtyń zamanaýı dıalogi qazaq óneriniń modernızmnen jańa medıaǵa deıingi evolıýsııasyn kórsetedi.
Ásirese «The2vvo» sýretshiler tobynyń «Qatysý» saýnd-ınstallıasııasy men Anvar Músirepovtiń «Alastaý» beıne-essesi sııaqty dástúrdi jańa medıamen úılestiretin jumystar kópshiliktiń nazaryn aýdartty.
«Birinshiden, maǵan qatty áser etken dúnıe – sizder ata-babanyń dańqty dástúrin jalǵastyryp, sonymen birge ony qazirgi zamanmen ushtastyra alatyndaryńyz. О́tken men bolashaqty úılestire otyryp, alǵa umtylyp jatyrsyzdar. Munyń nátıjesi keremet bolady. Bul – úlken jetistik, óıtkeni Batysqa jetpeıtini – osy», dedi Mysyr men Soltústik Afrıkadaǵy ıtalııalyq radıotelevızııa bıýrosynyń jetekshisi Mark Innaro.
Dástúrli qazaq ıirimderi men zamanaýı kórkemdik tájirıbelerdiń erekshe úılesimi synshylardyń ǵana emes, jalpy jurtshylyqtyń qyzyǵýshylyǵyn týdyrdy. Pavılon jumys istegen kúnderi kelýshiler sany artyp, jobany talqylap, pikir bildirgenderdiń de qarasy kóp boldy.
Aıta keteıik, otandyq sýretshilerdiń óner kórmesine qatysýy «ViledFashion» JShS bas demeýshisiniń, «Qazaq oil» JShS, «Universal Energy Kazakhstan» JShS qoldaýymen uıymdastyryldy.
«Navale» murajaıynyń tarıhı ǵımaratynda ótip jatqan 60-shy Venesııa óner bıennalesi 24 qarashaǵa deıin jalǵasady.
Eske salsaq, halyqaralyq óner kórmesi alǵash ret 1895 jyly Venesııada ótip, birden óner álemindegi basty oqıǵalardyń birine aınaldy. Eki jylda bir ret ótkiziletin bıennalege jarty mıllıonǵa jýyq adam qatysady.
