«Soltústik Palmıradan» arnaıy kelgen sán ekspresi elorda turǵyndaryn Sankt-Peterbýrgtiń sapaly brendterimen tanystyryp, zamanaýı sán álemindegi ózekti úrdisterdi talqylady. Sondaı-aq iskerlik baılanystar ornatyp, jańa seriktester tabý maqsatynda kezdesýler de ótkizdi.
Aıta keteıik, atalǵan sán saparyn «Sankt-Peterbýrg eksportty qoldaý ortalyǵy» ANO uıymdastyryp otyr. Sapar aıasynda qatysýshylarǵa «Fashion.Export» bilim baǵdarlamasynyń bir bóligine aınalǵan birqatar is-shara usynyldy. Bul baǵdarlama talantty dızaınerlerdi qoldaýǵa, olarǵa halyqaralyq naryqqa shyǵýǵa múmkindik berýge baǵyttalǵan.
Elordalyq sángerlerdi reseılik dızaınerlerdiń pret-a-porte kolleksııalarynyń jabyq kórsetilimine qatysyp, oı bólisý, sheberlik almasý syndy shyǵarmashylyq baılanystar shabyttandyra túskeni anyq. Áleýetti seriktester men shyǵarmashylyq ortanyń ókilderi sán ındýstrııasyndaǵy halyqaralyq yntymaqtastyqtyń shekarasyn keńeıtip, kelissózder júrgizdi.
«Bibisara» sán úıinde ótken reseılik óndirýshiler kıimderiniń jabyq kórsetilimi de sátti jobalarǵa ulasty. Jabyq kórsetilimge Sankt-Peterbýrg brendteriniń ókilderi de qatysty. Ár dızaınerdiń óz qoltańbasy, óz stıli birden kózge urady. Brend ıeleriniń aıtýynsha, sapa – kez kelgen ónimniń basty kilti. Sol sapa men úılesim, sulýlyq saı kelgende usynylǵan ónim joǵary baǵalanady.
«Catarina Nova» áıelder kıiminiń negizin qalaýshy Tatıana Semenova óz ónimderin tanystyra kele, basty maqsat – kıimniń kómegimen ár áıeldiń ózine jáne aınalasyndaǵylarǵa kóńil kúı syılaý múmkindigi bar ekenin dáleldeý deıdi.
«Bizdiń assortımentte syrtqy kıimder, kostıýmder, kóılekter, beldemsheler men shalbar jáne basqasy bar. Jumys barysynda ár kıimge bólek talǵammen muqııat qaraımyz, tek joǵary sapaly materıaldardy tańdaımyz. Biz kolleksııamyzdy Sankt-Peterbýrgte óz óndirisimizde tigemiz. Turaqty tutynýshylar bizdiń ónimderdiń yńǵaıly, sapaly ekenin jıi aıtady», deıdi T.Semenova.
Al Sankt-Peterbýrgtiń «Gerrusi» brendiniń basty urany – talǵampazdyq. Elena men Rodıon Malsev ózderi negizin qalaǵan otbasylyq kásipti sıpattaı otyryp, brendtiń erekshelikterin atap ótti.
«Kez kelgen dene bitiminiń «kemshilikteri» bolady. Bul, árıne, kemshilik emes. Biraq halyq denesindegi artyq-aýys tustaryn kemshilik dep qabyldaıdy. Sondyqtan eń aldymen óz «kemshilikterin» jasyratyn kıim izdeıdi. Bizdiń ónimniń ereksheligi de osy – adamnyń dene bitimi qandaı bolsa da barynsha sulý músin qylyp kórsetedi. Deneniń jasyratyn tustaryn sheber jasyryp, kórsetetin tustaryn erekshelep turady. Kıim – eń aldymen, ómir súrýge qajettilik bolsa, odan soń – sán úlgisi. Kıimdi qoǵam sán úshin kıedi, sán úshin tańdap, talǵaıdy», deıdi olar.
Sondaı-aq astanalyqtardy kúndelikti ómirge arnalǵan sándi kıimmen Onicape dızaınerleri tanystyrdy. Bul brendtiń ókilderi ónim dızaınyna tarıhı qala Sankt-Peterbýrgtiń aýa raıy men erekshe sáýletinen ıdeıalyq shabyt alǵanyn aıtty.
«2016 jyly alǵashqy toptamamyzdy shyǵardyq. Áli kúnge deıin suranysqa ıe. Kıim tigý kezinde biz stılge, tústerdiń alýan túrliligine jáne praktıkalyqqa erekshe nazar aýdaramyz. Biz tek sapaly materıaldardy, dáleldengen jabdyqtar men ınnovasııalyq matalardy qoldanamyz. Mundaı kıim jańbyr men jelden qorǵaıdy, deneniń tynys alýyna múmkindik beredi», deıdi Onicape ókili.
Sán sapary aıasynda reseılik dızaınerler qazaqstandyq seriktestermen zamanaýı sán týraly óz ıdeıalarymen bólisip, jemisti yntymaqtastyqtyń túrli nusqa-
laryn usyndy. Uıymdastyrýshylar bul sapar eki qala arasyndaǵy sán jáne mádenı almasý álemindegi mańyzdy oqıǵaǵa aınalǵanyna, shyǵarmashylyq ındýstrııalardyń damýyna, halyqaralyq baılanystardyń nyǵaıýyna yqpal etetinine senimdi.
Búgingi qoǵam – naryqtyń zamany. Básekelestik te álemdi bılep tur. Osy oraıda eki el sán mamandarynyń keleli kezdesýleri jańa jobalarǵa, tyń ózgeristerge bastaıtyny sózsiz.
