foto Senattyń baspasóz qyzmeti
Respýblıka kúni qarsańynda uıymdastyrylǵan aksııa aıasynda senatorlar Turan dańǵyly, Dinmuhamed Qonaev, Qabanbaı batyr jáne Dostyq kósheleriniń arasynda ornalasqan saıabaqta kógaldandyrý jumystaryn júrgizdi. Igilikti iske depýtattar men Palata Apparatynyń qyzmetkerlerinen bólek, Senat janyndaǵy sarapshylar klýbynyń músheleri jáne elordanyń tazalyǵyn kózdeıtin bastamalarǵa únemi óz úlesterin qosyp júrgen Taldaý mektebiniń túlekteri de atsalysty. Is-sharaǵa barlyǵy 100-ge jýyq adam qatysyp, olar alma aǵashynyń jáne moıyl, yrǵaı sııaqty buta jemisteriniń 200 kóshetin otyrǵyzdy.
«Prezıdentimiz Qasym-Jomart Kemeluly Toqaevtyń bastamasymen elimiz boıynsha ótkizilip jatqan «Taza Qazaqstan» jalpyulttyq ekologııalyq aksııasy barsha qazaqstandyqty ortaq iske jumyldyryp otyr. Bul bir rettik is-shara emes. Mundaı bastama – elimizde ekomádenıetti qalyptastyrýǵa jáne jańa qoǵamdyq etıka men patrıotızmdi nyǵaıtýǵa tyń serpin beretin júıeli jumys. Osyndaı naqty ister qorshaǵan ortaǵa qamqorlyqpen qaraýdy ár adam úshin kúndelikti normaǵa aınaldyrýǵa jol ashady», dedi senbilikke qatysqan azamattarmen tildesken Máýlen Áshimbaev.
Sondaı-aq Palata Spıkeri Memleket basshysy Qasym-Jomart Toqaev bıylǵy Joldaýynda qorshaǵan ortaǵa uqyppen qaraýdy odan ári damytýdyń mańyzdy ekenine basa mán bergenin aıtty. Sondyqtan qazirgi tańda tabıǵatty aıalaý jáne ekologııalyq jaýapkershilik qaǵıdattary kún tártibindegi ózekti máselelerdiń birine aınalyp otyr.
