Árıne, dıplomatııalyq ortada ártúrli elderdiń egemendik alýyna oraı ulttyq merekege asa qurmetpen qaraǵandyqtan osyndaı jaǵdaıda quttyqtaý joldaý dástúri qalyptasqan. Ulttyq mereke qarsańynda el Prezıdenti men halqynyń atyna kóptegen quttyqtaý jedelhattary kelip túsedi.
Budan bólek, Respýblıka kúnine oraı shet memleketterde qabyldaýlar ótkizilip, eldik kórmeler ashylyp, konsertter men basqa da mańyzdy is-sharalar ótedi. Bul is-sharalarǵa syrtqy saıası vedomstvolarynyń, basqa memlekettik organdarynyń basshylary, akkredıttelgen sheteldik dıplomattar, isker qaýym ókilderi, ınvestorlar, sondaı-aq ekijaqty qatynastardy damytýǵa eleýli úles qosqan shetel azamattary, qazaq ulttyq mádenı ortalyqtarynyń ókilderi, ǵylym jáne mádenıet qaıratkerleri qatysady. Uıymdastyrylǵan is-sharalardy tek resmı protokoldyq nemese formaldyq sharalar dep ataýǵa bolmaıdy. Olar ekijaqty qatynastardy nyǵaıtýǵa, Qazaqstan men sheteldik áriptes elder halyqtarynyń ortaq maqsattaryn kórsetip, elimizdiń ishki jáne syrtqy saıası basymdyqtary týraly aqparat berýge, sondaı-aq mádenı muramyzdy, jetistikterimiz ben ulttyq dástúrlerimizdi tanystyrýǵa múmkindik beredi.
Eń alǵash ret Respýblıka kúni Qazaqstannyń BUU-ǵa múshelik etkenine 30 jyldyǵynda osy uıymnyń Nıý-Iorktegi shtab-páterinde atap ótildi. Jalpy, shetelde elimizdiń Respýblıka kúnin merekeleý elinen jyraqta júrgen otandastarymyzdy qoldaýdyń mańyzdy aspektisi desek te artyq etpes. Sonymen qatar mundaı merekelik is-sharalardy uıymdastyrýǵa jıi qatysatyn qazaq stýdentteri arasynda otanshyldyq sezimin tárbıeleýdiń mańyzdy bóligi.
Osylaısha, Respýblıka kúni tek táýelsizdik sımvoly ǵana emes, sonymen qatar mádenı kórinis pen qoǵam birliginiń tuǵyryna aınaldy. Bul aıtýly kún búgingi tańda Qazaqstan halqyn biriktirip, áriptes memleketter men túrli halyqaralyq uıymdarmen ekijaqty qatynastardy nyǵaıtýǵa, elde josparlanǵan reformalardy júzege asyrýǵa zor yqpal etedi.
