Rýhanı dánekerlerge qurmet

Merekelik jıynda sala qyzmet­kerlerin oblys basshylary, óńir zııalylary, aýyl sharýashylyǵy qurylymdarynyń basshylary quttyqtady. Mysaly, aýyl kitaphanasynyń ótkeni men búgini týraly biraz máseleniń basyn qaıyrǵan belgili dıqan Ibrash Estaev óz oıyn «sizder meniń egin egip, bıdaı orǵanymnan júz ese artyq, myń ese saýapty is atqaryp jatyrsyzdar», dep túıindedi.

Oblys ákiminiń orynbasary Rınat Muha­metqalıev Kitaphanashy kúni elimizdiń eń ulyq ulttyq merekesi Respýblıka kúni qarsa­ńyn­da kelýin jaqsylyqqa joryp, kitap­hananyń el ómirindegi mańyzy zor ekenine toqtaldy.

«Zamanymyzdyń zańǵar qalamgeri, memleket qaıratkeri, oıshyl jazýshy Ábish Kekilbaıulynyń «Adamdy adam etken – kitap, adamzat etken – kitaphana» degen qanatty sózi – kitaphananyń qanshalyqty mańyzdy ekenin aıshyqtap tur. Kitaphana qashanda mádenı-rýhanı is-sharalar jıi uıymdastyrylatyn rýhanııat ordasy. Demek, kitaphanashylardy qoǵamnyń rýhanı dánekeri desek te bolady. Búginde óńirdiń mádenıet jáne bilim salasynda 1252 kitaphanashy jumys isteıdi. Qurmetti kitaphana qyzmetkerleri! Kásibı bilik-bilimderińizdi tynbaı jetildirip, osy baǵytta atqaryp kele jatqan úzdiksiz izdenisterińizge tabys tileımin», dedi Rınat Zákıuly.

Merekelik jıynǵa ardager kitaphanashylar da arnaıy qatysyp, keıingi býynǵa degen izgi tilekterin arnady.

«Kún saıyn segiz saǵat boıy kóz maıy­n taýysyp, kitappen, oqyrmanmen jumys is­teý ońaı emes. Kitaphanashynyń eńbegi – kózge kórinbeıtin jumys. Kelgen kitapty túpteý, shıfrlaý, elektrondy katalogke salý, oqyrmanǵa jetkizý, kúndelikti gazet-jýrnaldyń betindegi osy oqyrmanǵa kerek bolyp qalady-aý degen materıaldardy jıyp-terip, onyń elektrondyq jáne kartochkalyq nusqasyn jasap otyrý adamnan, árıne, úlken tózimdi talap etedi. Sondyqtan óz isine shyndap berile almaǵan adam kitaphanada kóp turaqtaı almaıdy. Al búgingi is-sharaǵa jınalǵandardyń deni osy qaladaǵy, sonaý shalǵaı túpkirdegi aýyl kitaphanalarynda talaı jyldan beri adal eńbek etip kele jatqan mamandar. Olardyń ishinde meniń shákirtterim de júr», deıdi Gúljamerııa Ǵalıasqarqyzy.

Saltanatty is-shara barysynda 5 kitap­hanashy «Mádenıet salasynyń úzdigi» tósbelgisimen, on shaqty kitaphanashy Máde­nıet jáne aqparat mınıstrliginiń Qurmet gramotasymen jáne Alǵyshatymen marapattaldy.

Merekelik keshte L.Tolstoı atyndaǵy oblystyq kitaphana ótkizgen «Úzdik jas kitaphanashy» baıqaýynyń qorytyndysy jarııalanyp, jeńimpazdarǵa arnaıy dıplomdar tabys etildi.

Qostanaı oblysy