Foto: Qaraǵandy oblysynyń prokýratýrasy
Aqtoǵaı aýdanynyń prokýratýrasy turǵyndardyń shamadan tys júk tıelgen aýyr kólikterdiń oblystyq mańyzy bar trassamen júrýine shaǵymdaryn erekshe baqylaýǵa aldy. Sebebi kóliktiń shamadan tys júktemesi oblys ortalyǵyna aparatyn joldyń buzylýyna ákelip jatyr.
Aıta keteıik, joldardyń buzylýynyń negizgi faktorlarynyń biri - aýyr kólikterdiń tasymaldaýǵa ruqsat etilgen salmaqty arttyrýy.
Esterińizge sala keteıik, avtokóliktiń jalpy salmaǵy júkpen birge kelesi mánderden aspaýy kerek:
- Úsh osti (M3 sanatyndaǵy topsaly avtobýstardy qospaǵanda) – 25 tonna;
- Tórt osti, onyń ishinde eki basqarylatyn osimen – 32 tonna;
- Bes osti – 38 tonna;
- Alty nemese odan da kóp osteri bar – 44 tonna.
«Aýdan prokýratýrasynyń bastamasymen polısııa qyzmetkerleri shamadan tys júk tıegen aýyr kólikterdi anyqtap, ustady. «Qaraǵandy oblysy boıynsha Kóliktik baqylaý ınspeksııasy» basqarmasynyń mamandary olarǵa qatysty ákimshilik materıaldar resimdedi. Nátıjesinde jeke jáne zańdy tulǵalar ákimshilik jaýapkershilikke tartyldy. Bir aı ishinde jalpy somasy 2 900 000 teńgeden asatyn 5 ákimshilik hattama resimdelip, aıyppuldar tólendi. Qabyldanǵan sharalar joldardyń merziminen buryn buzylýy men tozýyn boldyrmaýǵa yqpal etedi», delingen habarlamada.
Polısııa qyzmetkerleri aýyr júk kólikteriniń júrgizýshileri erejelerdi qatań saqtaýyn jáne belgilengen salmaq parametrlerinen aspaý kerektigin eske saldy. Ruqsat etilgen normalardy buzý ákimshilik jaýaptylyqqa tartylady.
