О́zge aýdandardaı emes, munda áli de jyldyń tórt mezgilinde tamaǵyn qı men kómir qyzýyna pisiretin, sýdy artezıan qudyǵynan iship otyrǵan aýyl turǵyndary bar. Oblys ákimi Serik Shápkenovtiń aıtýynsha, jyl sońyna deıin aýdan turǵyndaryn sapaly aýyzsýmen 100 qamtý josparlanypty.
«Qazir Qyzylqoǵa aýdanyndaǵy Sorkól, Sarqumaq, Qoǵam, Tasqudyq, Aqqora, Qońyraýly, Bylqyldaqty, Kenbaı, Qonystaný sekildi 9 eldi mekende aýylishilik sý qubyry júrgizilip jatyr. Al Muqyr aýylynda ekinshi sý aıdaý stansasyn qaıta jańǵyrtý jumysyn jyl sońyna deıin aıaqtaýdy baqylaýymda ustap otyrmyn. Buǵan qosa «Keregen-Saǵyz-Jamansor» toptyq sý qubyryn rekonstrýksııalaý, Mııaly aýylyna jazǵy sý qubyryn júrgizý aıaqtalady», deıdi S.Shápkenov.
Ákimniń málimetine súıensek, Qyzylqoǵa aýdanyndaǵy turmysy tómen turǵyndardy baspanamen qamtýǵa 80 páter satyp alý kózdelgen. Osy kezge deıin Mııaly aýyldyq okrýginde 39, Jangeldınde – 5, Saǵyz aýyldyq okrýginiń turǵyndaryna 6 baspana satyp alynypty. «Jyl sońyna deıin taǵy 50 úıdi satyp alyp beremiz. Bul másele bıyl tolyqtaı sheshimin tabady», dep málimdedi oblys ákimi.
Qyzylqoǵa aýdanynda keıingi jyldary turǵyndardyń turmysyn jaqsartýmen qatar, buqaralyq sportty damytýǵa da nazar aýdaryldy. Qazir aýdannyń 10 myńǵa jýyq turǵyny sportpen turaqty túrde shuǵyldanady. Degenmen 10 aýyldyq okrýgtiń ekeýinde ǵana sport kesheni bar. Bıyl 8 aýylda 11 ashyq sport alańynyń qurylysy bastaldy. Sondaı-aq aldaǵy jyly 7 sporttyq nysandy paıdalanýǵa berý josparlanyp otyr.
Jaqynda aýdannyń eki aýylynda sport kesheni ashyldy. Onyń biri Tasshaǵyl aýyldyq okrýginde ornalasqan. Bul okrýgte 1884 adam turady. Bir óndiristik kooperatıv, 26 sharýa qojalyǵy, 1 orta mektep, 1 balabaqsha, 1 ýchaskelik ambýlatorııa, 5 dúken, kitaphana, avtomatty telefon stansasy, pochta baılanysy toraby jumys isteıdi.
Sport kesheniniń ekinshisi Oıyl aýyldyq okrýginiń ortalyǵy – Jasqaırat aýylynda ornalasqan. Mundaǵy 410 otbasynda 2310 adam tirkelgen. Okrýgte 1 seriktestik, 17 sharýa qojalyǵy men 66 kásipkerlik nysany bar. «Shalqyma» mádenıet úıinde aýyldyq kitaphana ornalasqan. Turǵyndarǵa mádenıet úıiniń janynan dombyra, estradalyq ansambli, drama, bı, án úıretý, sýretshiler úıirmeleri men mádenı-úgit brıgadasy qyzmet kórsetedi.
Qanattas qonystanǵan eki aýyldyń bir-birinen aıyrmasy joqqa tán. Turǵyndar ortalyqtandyrylǵan sý, gaz júıesin paıdalanyp otyr. Qos okrýgte ıgilikke berilgen sport keshenderiniń de bir-birine uqsastyǵy kóp. Jańa nysandar fýtbol, voleıbol, basketbolǵa arnalǵan alań, kúres zalymen, túrli qural-jabdyqpen qamtylǵan.
«Elimizde buqaralyq sport pen dene shynyqtyrýdy damytý, salaýatty ómir saltyn qalyptastyrý keń qanat jaıyp keledi. Sonyń naqty mysalyndaı, Jasqaırat pen Tasshaǵyl aýylynda jańa sport kesheni ashyldy. Munda elimizdiń abyroıyn asqaqtatatyn, kók týymyzdy kókte jelbiretetin rýhty sportshylar tárbıelenetinine senemin», dedi Serik Shápkenov.
Atyraý oblysy
