Foto: Ashyq derekkóz
Is Atyraý qalasynyń №2 sotynda qaralǵan. Sottyń habarlaýynsha, blogerler qalanyń saýda ortalyqtarynyń biriniń býtıgine kirip, tikeleı efırge shyǵyp, saýda ortalyǵynyń sanıtarlyq normalardy saqtamaýy boıynsha polısııa qyzmetkerlerin shaqyrǵan.
Anyqtalǵandaı, býtık ıesiniń uly blogerler satýshylarǵa jumys jasaýǵa kedergi keltirip jatyr degen oıǵa kelip, ashýlanyp, kúsh qoldanǵan. Olardy saýda ortalyǵynan shyǵarýǵa tyrysyp, densaýlyqtaryna zııan keltirmesten, tán aýrýyna ushyratqan.
Prokýror sottalýshyny 40 táýlikke qamaqqa alyp, jábirlenýshilerdiń azamattyq talap aryzdaryn tolyq qanaǵattandyrýdy suraǵan. Aıyptalýshy kinásin moıyndamaı, ózin aqtaýdy ótingen. Al, jábirlenýshiler oǵan qatań jaza taǵaıyndaýdy suraǵan.
«QK-tiń 109-1-babynyń 2-bóliginiń 1-tarmaǵynda 100-den 200 aılyq eseptik kórsetkishke deıingi mólsherde aıyppul salý ne sol mólsherde túzeý jumystaryna, ne 100-den 200 saǵatqa deıingi merzimge qoǵamdyq jumystarǵa tartý, ne 30 táýlikten 50 táýlikke deıingi merzimge qamaqqa alý túrindegi jaza kózdelgen. Sottalýshy QK-tiń 109-1-babynyń 2-bóliginiń 1-tarmaǵymen kináli dep tanylyp, oǵan 461 500 teńge (125 aılyq eseptik kórsetkish) aıyppul salý jazasy taǵaıyndaldy. QK-tiń 98-3-babynyń negizinde onyń júris-turysyna 3 aı merzimge erekshe talaptar belgilendi. Azamattyq talap aryzdary ishinara qanaǵattandyryldy: sottalýshydan jábirlenýshilerdiń ár qaısysynyń paıdasyna 200 myń teńgeden moraldyq zalal ótemaqysy óndirildi», delingen sot habarlamasynda.
Sot úkimi zańdy kúshine engen joq.
