«Qaırat» – chempıon!

Bıylǵy jyly premer-lıganyń oıyn kestesinde birqatar ózgeris boldy. Eń bastysy, komandalar jańa maýsymdy 1 naýryzda ádettegideı 14 emes, 13 klýbpen bastady. Sebebi «Maq­taaral» ujymy lısenzııalaý talaptaryna sáıkes kelmegenine baılanysty qatysýdan shettetildi. Al osy klýbty almastyrýy kerek bolǵan «Aqsý» komandasy qarjylyq qıyndyqqa baılanysty týrnırden bas tartty.

Jańa maýsym aldyndaǵy jańalyqtardyń biri elimizdiń chempıonatynda legıonerlerge qoıylatyn shekteýdi alyp tastaý bol­dy. Buryn alańǵa shyqqanda legıoner sany mindetti túrde jeteý bolsa, endi olar­dyń sanyna shekteý joq ekeni habarlandy. Bir­aq ótinish bergen kezde jıyrma bes fýtbol­shynyń keminde 13-i Qazaqstan fýt­bo­lynyń ókili bolýy kerek degen talap qoıyldy.

Bıylǵy QPL maýsymynda semeılik «Elim­aı» men astanalyq «Jeńis» fýtbol klýbtary debıýt jasady. «Elimaı» maýsymdy 6-orynmen, al «Jeńis» 10-orynmen aıaqtady.

Elimizdegi basty fýtbol dodasynda tosyn jaǵdaı da boldy. Máselen, «Shahter» tarıhta alǵash ret premer-lıgadan shyǵyp qal­dy. Qaraǵandylyq komanda elimizdiń eki dúrkin chempıony, el kýboginiń ıegeri, sondaı-aq eýrokýbokterdiń toptyq kezeńine ótken birinshi otandyq klýb sanalady.

QPL sońǵy týrynda chempıondyqqa talas almatylyq «Qaırat» pen elordalyq «As­tana» arasynda órbidi. Báseke sońǵy týr­ǵa deıin saqtaldy. Sheshýshi oıynda «Qaı­rat» syrt alańda «Atyraýdy» 1:0 ese­bi­men jeńip, chempıondyqty ıelendi. Qo­naq­tar qura­myn­daǵy mańyzdy goldy, 11 metrlik aıyp dobyn 59-mınýtta grýzııa­lyq legıoner Grıgorıı Zarııa soqty. Pe­naltı brazılııalyq Joao Paýlony shalyp qulatqany úshin belgilengen bolatyn. Osylaısha, almatylyq komanda 2024 jylǵy el chempıony atandy.

Kúmis medaldi qatarynan ekinshi jyl elordalyq «Astana» jeńip aldy. Grıgorıı Babaıannyń komandasy sońǵy 26-týrda «Jeti­sýdy» 5:0 esebimen oısyrata utty.

Qola medaldi «Aqtóbe» fýtbolshylary ıelendi. Olar maýsymnyń sońǵy matchynda Túrkistan oblysynyń «Turan» komandasyn 2:0 esebimen jeńdi.

Byltyrǵy el chempıony «Ordabasy» bul maýsymda chempıondyq ataǵynan aıyrylyp, týr­nırlik kestede 4-orynda qaldy. Sońǵy oıynda olar «Elimaıdan» 2:1 esebimen basym tústi.

«Qaırat» komandasy chempıondyq ataqtyń arqasynda kelesi jyly elimizdiń sýperkýbogi, ÝEFA Chempıondar lıgasynyń irikteý kezeńinde baq synaýǵa múmkindik aldy. Týr­nırdiń qorytyndysy boıynsha «Astana», «Aq­tóbe», «Ordabasy» komandalary da eýrokýbokke qatysa alady.