- Áıelder tennıs qaýymdastyǵy (WTA) 2024 jyldyń 11 qarashasynda álemdik reıtıngtiń jańartylǵan nusqasyn jarııalady. Elimizdiń birinshi raketkasy Elena Rybakına jańa reıtıngte bir pozısııaǵa túsip, endi altynshy orynda tur. Álemniń besinshi raketkasy retinde Chjen Sınven (Qytaı) tanyldy. Qytaılyq sportshy sońǵy jaqsy kórsetkishteriniń arqasynda birden eki satyǵa kóterildi. 11 qarashadaǵy WTA reıtıngi: 1. Arına Sobolenko (Belarýs) – 9 416 upaı; 2. Iga Shventek (Polsha) – 8 370; 3. Koko Gaýff (AQSh) – 6 530; 4. Jasmın Paolını (Italııa) – 5 344; 5 (+2). Chjen Sınven (Qytaı) – 5 340; 6 (-1). Elena Rybakına (Qazaqstan) – 5 171; 7 (-1). Djessıka Pegýla (AQSh) – 4 705; 8. Emma Navarro (AQSh) – 3 589. Elimizdiń ekinshi raketkasy Iýlııa Pýtınseva 29-orynda ornalasqan.
- Birikken kúres álemi uıymy sońǵy jarystardaǵy kórsetkishterdi saralap, úzdik sportshylardyń tizimin jańartty. Oǵan sáıkes áıelder kúresinen ulttyq qurama múshesi Jámıla Baqbergenova tórtinshi orynnan ekinshi orynǵa kóterildi. Onyń enshisinde qazir 45 000 upaı bar. 72 kıloda óner kórsetetin jerlesimiz jýyrda ǵana Albanııanyń Tırana qalasynda ótken álem chempıonatynda kúmis medal alǵan bolatyn. Ol barlyq qarsylasyn utyp, fınalda japonııalyq Amı Isııge ǵana ese jiberdi. Álemdik reıtıngtiń de kósh basyn osy Isıı bastap tur. Úzdik úshtikti rýmynııalyq Aleksandra Nıkoleta Angel túıindedi. Aıta keteıik, Jámıla osymen álem chempıonattarynda qatarynan 4 jyl jeńis tuǵyrynan kórindi. Buǵan deıin 2021, 2022 jyldary kúmis alsa, 2023 jyly qola júldege qol jetkizgen bolatyn.
- Kásipqoı boksshy Ivan Dychkonyń kelesi kezdesýine qatysty aqparat shyqty. Ol 27 jeltoqsan kúni Almaty qalasynda ótetin boks keshinde óner kórsetedi. Bul jóninde jaýapty promoýterlik kompanııa málimdedi. Dychko sońǵy jekpe-jegin bıyl tamyz aıynda Amerıkada ótkizdi. Ol jergilikti Kreıg Lıýıspen kezdesip, ekinshi raýndta qarsylasyn nokaýtpen jeńdi. Jalpy, Ivan búginge deıin kásipqoı rıngte 13 kezdesý ótkizip, 13-inde de basym tústi. Tipti onyń 12-sin ýaqytynan buryn aıaqtady. Dychkonyń kelesi qarsylasyna qatysty ázirge naqty aqparat joq. Eske sala keteıik, birer aı buryn sport portaldary «qazaqstandyq Ivan Dychko men ózbekstandyq Bahadúr Jalolov kezdesýi múmkin» degen málimet taratty. Qos myqty áýesqoı boksta 4 ret kezdesip, 4-eýinde de jerlesimiz jeńiske jetti. Qazir ekeýi de kásipqoı boksta óner kórsetedi.
- Kókshetaýda sport sheberi Asqar Satybaevty eske alýǵa arnalǵan jastar arasynda bokstan halyqaralyq týrnır ótti. Erler arasyndaǵy medalder 46-dan 92+ kıloǵa deıingi on tórt salmaq dárejesinde sarapqa salyndy. Jarys qorytyndysynda elimizdiń boksshylary on úsh altyn medal jeńip aldy. Álisher Áripjan (46 kg), Nurbek Azadov (48 kg), Beksultan Kópbergenov (51 kg), Álı Mereke (60 kg), Muhamedalı Qalıev (63,5 kg), Tagır Sataev (67 kg), Bekarys Nurmuhan (71 kg), Jandos Alpysbaev (75 kg), Amanjol Imanǵalıev (80 kg), Baqytjan Aıtmuhanov (86 kg), Erjat Tileýjan (92 kg), Nursultan Joldasbek (92+ kg) syndy boksshylar jeńis tuǵyryna kóterildi. Birinshi oryn alǵan jalǵyz qonaq О́zbekstan ókili boldy. 57 kıloǵa deıingi salmaq dárejesinde synǵa túsken Djamshıd Djabbarov altynnan alqa taqty.
- Almaty qalasynda basketboldan 15 jasqa deıingi uldar arasynda kúzgi ishki birinshilik ótti. Elimizdiń ár óńirinen kelgen 15 komanda aldymen toptyq kezeńde ózara myqtyny anyqtady. Úzdik shyqqan tórt komanda júldeli oryndardy sarapqa saldy. Aldymen qola júlde úshin Qaraǵandy, Atyraý komandalary kezdesti. Saryarqa basketbolshylary tartysty oıynda tabandylyq tanytyp, 70:54 esebimen jeńiske jetti. Al bas júlde úshin Almaty jáne shymkenttik órender sheberlik baıqasty. Bastapqy kezeńde alań ıeleriniń qarqyny kúshti edi. Ýaqyt óte shymkenttikter tizgindi qolǵa alyp, qarsylastarynan uzaı berdi. Matchtyń qorytyndy nátıjesi – 61:31. Ońtústik órenderi el chempıony atandy.
