Foto: Vedomstvo
Sarapshy 2003 jyly qabyldanǵan, klımattyq ózgerister bolyp jatqan qazirgi zaman suranysyna sáıkes kelmeıtin qoldanystaǵy Sý kodeksine 20 jylda 272 ózgeris engizilgenin aıtty. Onyń aıtýynsha, qazirgi kodekstiń logıkalyq turǵyda sáıkes kelmeıtin tustary da bar.
«Jańa redaksııada kodeks normalary júıelenip, sý resýrstaryn únemdeýge jáne ony qorǵaýǵa basymdyq beriledi. Máselen, basseındik ınspeksııalarǵa memlekettik baqylaý fýnksııalarymen qatar tergeý fýnksııalary da berilip otyr. Bul sýdy zańsyz paıdalanýshylarmen kúresti kúsheıtýge múmkindik beredi», dedi ınjener-gıdrotehnık Ámirhan Kenshimov.
Sý resýrstary jáne ırrıgasııa mınıstrligi málim etkendeı, atalǵan vedomstvo ázirlegen jańa Sý kodeksiniń jobasyn Májilis depýtattary birinshi oqylymda biraýyzdan maquldady. Qujat klımattyń ózgerýine beıimdelýge jáne sý únemdeý prınsıpterin engizýge aıryqsha nazar aýdarady. Alǵash ret sý nysandaryn sarqylýdan jáne basqa da jaǵymsyz saldardan qorǵaıtyn «ekologııalyq aǵyn» uǵymy engiziledi. Sondaı-aq shaǵyn kólderdi, ózenderdi, toǵandardy, muzdyqtardy, sýly-batpaqty aımaqtardy qorǵaý jóninde normalar engizildi.
Memleket basshysynyń tapsyrmasy boıynsha kodeks jobasyna eldi mekender men nysandardy tasqyn jáne erigen qar sýynan qorǵaý is-sharalary engizildi. Sý resýrstaryn basqarýdaǵy úılestirýdi jaqsartý úshin memlekettik jáne jergilikti atqarýshy organdardyń, jergilikti ýákiletti organdardyń quzyretteri aıqyndaldy.
