Mádenı kesh bastaýynda qoǵam qaıratkeri, ekonomıka ǵylymdarynyń doktory, professor Baqbergen Dosmanbetov, Qarmaqshy aýdandyq ardagerler keńesiniń tóraǵasy Asqar Merekov pen aýdandyq mádenıet jáne tilderdi damytý bóliminiń basshysy Nurshat Naýryzbaeva lebiz bildirdi.
О́z zamanynda ákesi Dúzbenbettiń tárbıesimen bala Jıenbaı jastaıynan baǵzy ónerdiń baıraǵyn kóteripti. Jalpy, Syrda jyraýdan otyzǵa tarta maqam qalǵan desedi. Dáýirlerden órnegi buzylmaı jetken dástúrli ónerdi erekshe nasıhattaıtyn topyraqta «Kórǵuly» jyry Jıenbaı nusqasymen jyrlanady. Áıgili Turmaǵanbet aqyn «Esenjan, Júsip, Jıenbaı, júırikteri zamannyń, otarbadaı ár jerden, kórinetin bir-aq burqyly…» dep baǵalaǵan jyraýdy aqyn Qýanysh Baımaǵanbetuly «Jıenbaı jyr dúldúli Ketedegi, shákirt qyp kóp shaıyrdy jetele. Balasy Rústembek o da júırik, demeıdi Jıenbaıdan bóten edi…» dep jyrǵa qosqan.
Jıenbaıdan balasy Rústembekke, Rústembekten uldary Kósheneı men Bıdasqa jalǵasqan baǵzy óner atadan balaǵa sabaqtasyp keledi.
Jyr dodasynda Jıenbaı jyraýdyń shyǵarmashylyǵy nasıhattalyp, «Kórǵuly» dastanyn urpaǵy Bıdas Rústembekov jyrlady.
Mádenı keshte halyqaralyq, respýblıkalyq baıqaýlardyń laýreaty Baıbol Kósheneı, Ádilhan Qýanbaev, Aıgerim Eshbaeva óner kórsetip, el yqylasyna bólendi.
QYZYLORDA
