Foto: Aqorda
Áńgimelesý barysynda elimizde energetıka, telekommýnıkasııa salalaryndaǵy iri ınvestısııalyq jobalardy iske asyrý barysy qarastyryldy.
Power International Holding (PIH) kompanııasy Qashaǵanda gaz óńdeý zaýyttaryn, Beıneý – Bozoı – Shymkent gaz qubyrynyń ekinshi jelisin, sondaı-aq jańa kompressor stansııasy men Aqtóbe – Qostanaı magıstraldi gaz qubyryn salýǵa qatysady. Qasym-Jomart Toqaev bul jobalar elimizdiń energetıkalyq qaýipsizdigin nyǵaıtýǵa eleýli úles qosatynyna nazar aýdardy.
PIH dırektorlar keńesiniń tóraǵasy Mýataz Ál-Haıat qazaq tarapymen telekommýnıkasııa, energetıka salalaryndaǵy ınvestısııalyq jobalar boıynsha túbegeıli kelisimge kelgenin aıtyp, atalǵan baǵyttaǵy jumysty júzege asyrý josparyn tanystyrdy.
Sonymen qatar kompanııa qazir Qyzylorda oblysynda bý-gaz qondyrǵysyn salý jáne oblysaralyq elektr jelilerin tartý jobalary boıynsha kelissóz júrgizip jatyr.
Budan bólek, Qatar konglomeratynyń basshylary jasandy ıntellekt baǵytynda birlesken bastamalardy qolǵa alýǵa qyzyǵýshylyq tanytyp otyr.
Memleket basshysy Qazaqstan Úkimeti tarapynan qatarlyq ınvestorǵa qolaıly jaǵdaı jasalatynyn rastap, barlyq jumysty joǵary standarttarǵa saı nátıjeli oryndaýdyń mańyzyn atap ótti.
