Semeıdegi balalar temirjoly 1979 jyly temirjolshylar kúnine oraı ashylǵan bolatyn. Alaıda 90 jyldardyń ortasyna qaraı jabylǵan edi. Mine, 20 jyldan astam ýaqyttan keıin balalar temirjoly qaıta qalpyna keltirildi. 2023 jyldyń 5 maýsymynda oblys ákimi Nurlan Uranhaev Ortalyq kommýnıkasııalar qyzmetiniń óńirdegi kóshpeli baspasóz konferensııasynda balalar temirjolyn jandandyrýdy josparlap otyrǵanyn aıtqan edi. Atalǵan nysan temirjol araldyń ásem jerlerin aralap, jolaýshylarǵa Ertis ózeniniń erekshe tabıǵı landshafy men ádemi kórinisterin tamashalaýǵa múmkindik beredi.
Birinshi kezeńde temirjol uzyndyǵy 2 shaqyrym bolady. Araldaǵy kópirden bıologııalyq ortalyqqa deıingi aralyqta júredi. Teplovoz ben vagondar temirjol tehnıkasyna mamandanǵan Qambar mashına jasaý zaýytynda daıyndaldy. Uzyndyǵy 12 metr bolatyn ár vagonda 32 oryn bar. Eger marshrýt suranysqa ıe bolsa qosymsha vagondarǵa tapsyrys beriledi. Atalǵan joba aıasynda KAZ Minerals Toby 620 mln qarjy bólip, teplovoz ben vagondardy satyp alýǵa demeýshilik jasady. Al, «Baqyrshyq taý-ken kásiporny» ınfraqurylymdy salýdy óz moınyna aldy.
Balalar temirjoly tek oıyn-saýyq orny ǵana emes, jastardyń temirjol mamandyǵyna qyzyǵýshylyǵyn arttyrýǵa yqpal etetin mańyzdy bilim berý jobasy bolmaq. Uıymdastyrýshylar aldaǵy ýaqytta Qazaqstan temirjoly basshylyǵy tarapynan qajetti qyzmetkerlerdi oqytý, temirjol mamandyǵyna baýlıtyn balalar úıirmesin qurý maqsaty kózdelgenin jetkizdi.
SEMEI
