Asqat Bekqalıuly – myqty grafık sýretshi. Onyń lınogravıýra tehnıkasynda oryndalǵan shyǵarmalarynda týǵan jer taqyryby, ulttyq naqyshty qazaqy bolmys, balalyq shaq beınelengen. Qylqalamynan shyqqan kompozısııalar asqan sheberligimen baýrap alady. Qarapaıym syzyqtar tizilip kelip qym-qýyt oqıǵaǵa, plastıkasy men kórkemdigi keremet qııýlasqan ǵajaıyp óner týyndysyna aınalady.
Shyǵarmalary kópshilik kóńilinen shyǵyp, ónertanýshylardyń oń baǵasyn alǵan. Ol respýblıkalyq, oblystyq, qalalyq kórme-baıqaýlardyń laýreaty. Halyqaralyq, respýblıkalyq kórmelerge qatysyp keledi. Sýretshiniń jumystary elordadaǵy Ulttyq mýzeıdiń, Reseıdegi «Lıberov-sentr» memlekettik kórkemsýret mýzeıiniń, Atyraý qalasyndaǵy «Aq Jelken» shyǵarmashylyq ortalyǵynyń, Aqtóbe oblysyndaǵy Sh.Bersıev atyndaǵy Oıyl aýdandyq óner jáne ólke tarıhy mýzeıiniń qorynda, Ispanııada (Valensııa qalasy), Tatarstanda (Qazan), elimizdegi jeke jınaqtarda saqtaýly.
Jaqynda Asqat Batys Qazaqstan oblysynyń memlekettik arhıvinen tabylǵan «Jaskeleń-Qońyrsha» atty lırıkalyq-qaharmandyq jyryna arnap sıkldy shyǵarmalar saldy. Bul grafıkalyq ıllıýstrasııalar BQO Halyq shyǵarmashylyq ortalyǵynyń 80 jyldyq mereıtoıy aıasynda jaryqqa shyqqan «Jaskeleń-Qońyrsha» jyry kitabynda jarııalandy.
– Bul jyrdy kitap etip shyǵararda burynǵy dástúrge boı urǵymyz keldi. Iаǵnı jyrdyń kórkem epızodtaryn kórkem ıllıýstrasııalaý uıǵaryldy. Ol úshin jas ta bolsa tanymal, daryndy sýretshi Asqat Ábdeshevke qolqa saldyq. Asqat Bekqalıuly bul mindetti abyroımen atqardy. Onyń sheberlikpen, shynaıy yqylaspen salǵan grafıkalyq týyndylary jyrdaǵy onsyz da shytyrman epızodtardy odan beter qulpyrtyp, qosymsha reń berip baıytyp jiberdi. Mundaı qyrýar ýaqyt pen eńbekti talap etetin grafıkalyq sýretterdi sońǵy ret keńes kezeńinde shyqqan ertegi, epostardan kórgen shyǵarmyz, – deıdi osy jınaqty qurastyrýshy Nurlan Sádir.
Biz búgin «Egemen Qazaqstan» gazetiniń oqyrmandaryna Asqat Ábdeshevtiń «Jaskeleń-Qońyrsha» jyryna arnap salǵan sıkldy grafıkalyq týyndylaryn usyndyq.
Batys Qazaqstan oblysy
