Oqýshy – bolashaq maman, jeke tulǵa. Mekteptegi ár balanyń kóńilin taýyp, qabiletin ashý ustazdarǵa zor jaýapkershilik júkteıdi. Mektebimizdiń ashylǵanyna 90 jyl boldy. Osy aralyqta bilim ordasy qanshama jetistikke qol jetkizdi. Sonyń barlyǵynda muǵalimniń de, tárbıeshiniń de eseli eńbegi jatyr. Shákirt jetistigi – muǵalimniń mereıi. Búginde bilim ordamyzdan túlep ushqan shákirtterimiz joǵary oqý ornyna grantqa oqýǵa túsip, jaqsy nátıjemen támamdap, árbir salada eseli eńbek etip júr. Túlekterimizdiń jetistigi mektebimiz úshin úlken abyroı, joǵary jetistik. Sońǵy jyldary muǵalim mereıin ósirýge baǵyttalǵan «Pedagog mártebesi týraly» zań bilim salasynda eńbek etip júrgen ustazdardyń júregine jol tapty. «Alty Alashtyń basy qosylsa, tórdegi oryn – muǵalimdiki» dep Maǵjan Jumabaev aıtqandaı, qazirgi kezde muǵalimder óz mártebesine saı sapaly bilim berý úrdisine belsene aralasyp jatyr. Bilim salasyndaǵy mańyzdy qujat pedagog qyzmetine sony serpilis ákeldi. Muǵalim quqyǵynyń arnaıy zańmen qorǵalýy, ustazdardyń qoǵam aldyndaǵy eńsesin kóterip tastady. Qoǵamda ustazǵa degen aıryqsha kózqaras qalyptasty. Júktemesi azaıyp, bilim men ilimdi bolashaq urpaqqa jetkizýshi tulǵa dárejesine kóterildi. Prezıdent tapsyrmasyna oraı bul baǵyttaǵy jumys áli de jalǵasyn taýyp otyr. Muǵalimniń qoǵamdaǵy róli artyp, jigerine jiger qosyldy.
Qazir mektebimizde 235 oqýshy bilim alady. Munda negizgi pándermen qosa osy balalardy ómirge beıimdeıtin arnaıy pánder oqytylady. Olardyń qatarynda mımıka, pantomımıka, keńistikti baǵdarlaý, kórý qabiletin túzetý, emdik deneshynyqtyrý degen sııaqty pánder bar. Arnaıy mýzyka bólimi jumys isteıdi. Mine, osy baǵytta mektep ustazdaryna túsetin salmaq ta, jaýapkershilik júgi de óte joǵary. Ár oqýshynyń júregine jol taýyp, onyń qoǵammen yqpaldastyǵyna bar-kúsh jigerin salyp júrgen mektep ujymy búginde jeke pánder boıynsha, mýzyka jaǵynan jetistikke jetip júrgen oqýshylaryn maqtan etedi. Mekteptegi ult-aspaptar orkestri, dombyra, fortepıano, taǵy da basqa baǵyttaǵy synyptarda oqýshylar óz qabiletterin damytyp jatyr. Osyndaı erekshe jaǵdaıda eńbek etip jatqan mektep muǵalimderi men jetistikke qulshynǵan oqýshylar mektebimizdiń abyroıyn asyryp, árdaıym jeńis tuǵyrynan kórinip keledi. Bul – memleket tarapynan ustazdardy qoldaýǵa baǵyttalǵan jobalar jemisi.
Gúljanar NURPEIISOVA,
Qazaqstannyń Eńbek Eri,
№4 arnaıy mektep-ınternattyń matematıka pániniń muǵalimi
