Kollajdy jasaǵan – Záýresh Smaǵul, «EQ»
Mádenıet jáne aqparat mınıstrliginiń tapsyrysy boıynsha «Ulttyq kıno ortalyǵynyń» qoldaýymen túsirilgen týyndy jyl ortasynda Kanadadaǵy «Fantasia Film Festival» festıvalinde top jardy. Al fılm akterleri Berik Aıtjanov pen Anna Starchenko «Úzdik akter» atalymynda biraýyzdan halyqaralyq synshylardyń qoldaýyna ıe bolsa, kınokartına operatory Erkinbek Pitirálıev «Oskar» akademııasynyń múshesi atandy. Sonymen qatar aıtýly fılm «Reims Polar 2024» kınofestıvalinde fransýz synshylary qaýymdastyǵynyń arnaıy syılyǵymen marapattaldy.
«Dala qasqyry» – trıller men drama janryn ón boıyna sheber úılestire bilgen shytyrman oqıǵaly fılm. Kórkem týyndyda joǵalǵan ulyn izdegen Tamara esimdi áıeldiń oqıǵasy baıandalady. Ol kómekke júginý úshin detektıv jaldaıdy jáne bul sheshimi kútpegen saldarǵa ákeledi. Ssenarııi alty jyl jazylǵan kartınanyń túsirilim jumysy 2021 jyly bastalyp, Almaty jáne Jetisý oblystarynyń aýmaǵynda ótken. Oǵan 100-den astam maman jumylǵan. Fılmdegi qaýipti trıýkterdi elimizdiń kaskaderlerimen qatar, Belorýssııadan arnaıy shaqyrylǵan mamandar kásibı joǵary deńgeıde oryndap shyqty.
Fılm men jalpy týyndynyń túsirilý jumysy týraly Ádilhan Erjanov: «Dala qasqyry» – avtorlyq fılm. Balasyn janushyra izdegen ananyń eshnárseden taısalmaı, kedergilerge qaramaı, tipti qaýippen betpe-bet kelse de, artqa sheginbeı, kerisinshe, alǵa umtylatynyn baıandaıdy. Fılmniń basqa sıýjettik jelisi joq, ol oryn alǵan oqıǵanyń aınalasyn ǵana aıshyqtap, kórermenge tap-tuınaqtaı etip jetkizedi», deıdi rejısser túsirilim jumysynyń qyr-syryn baıandap. Al fılm prodıýseri Álııa Meńdiǵojına atap ótkendeı, «Dala qasqyry» – kúshti áıel týraly fılm. Onyń sózinshe, keıipker bir qaraǵanda álsiz kórinedi, biraq is júzinde onyń minezi men rýhy myqty. «Fılm álemdik aýdıtorııanyń nazaryn birden aýdardy. Halyqaralyq festıvalde júldeli oryndarǵa ıe bolyp, ózin moıyndatty», deıdi prodıýser.
Bul «Dala qasqyrynyń» birinshi jetistigi emes. Sondaı-aq ol Belgııada ótken halyqaralyq kınofestıvalde de bas júldemen qanjyǵa maılady. Uıymdastyrýshylar qazaq rejısseriniń qaıtalanbas qoltańbasy men talantyna tań qalyp, onyń jańa týyndysyn 2024 jylǵy «Big Screen Competition» baıqaýynyń negizgi baǵdarlamasyna da oılanbastan engizdi.
