Kollajdy jasaǵan – Qonysbaı ShEJIMBAI, «EQ»
Sondaı-aq bıyl pıtchıngten ótken 17 jobanyń túsirilim jumysy bastalady. Olardyń qatarynda áleýmettik mańyzy joǵary, keń aýqymdy kórermen aýdıtorııasyna arnalǵan fılmder, oqıǵaly, birlesip shyǵarylatyn, anımasııalyq, derekti jáne debıýttik fılmder de bar.
Máselen, «Kenjem qaıda?» kórkem týyndysynda kenje balanyń taǵdyry baıandalyp, otbasy qundylyǵy sýretteledi. Atalǵan fılm balalaryn jalǵyz ózi asyrap otyrǵan Gúlnazdyń taǵdyryn qozǵaıdy. Kınokartınanyń prodıýseri – Anar Júnisova, Anna Chakırtova. Rejısseri – Dıas Qulmaqov.
Túsirilim jumysy osy jylǵa josparlanǵan taǵy bir týyndy – «Aqjeleń». Mahabbatqa adaldyq, qazaq áıeliniń qaıratkerligi, baýyrmaldyq, anaǵa degen súıispenshilik sýretteletin fılm názik bir ıirimge toly bolmaq. Prodıýseri – Baǵashar Aryqbaev, rejısseri – Bekzat Smadııarov.
Qazaq kınosy tarıhyndaǵy ormanshylar týraly tuńǵysh jeke kınokartına da bıyl túsiriledi. Rejısser Rashıd Súleımenovtiń «38» fılmi qarapaıym eńbek adamynyń erligin ashyp kórsetýdi maqsat etip otyr. Sondaı-aq detektıv janryndaǵy «Búrkitshi» fılminde aýyldaǵy jumbaq jaǵdaıdyń syry ashylady. Shytyrman oqıǵaǵa negizdelgen kınokartınanyń prodıýseri – Mádına Dúısembaeva, rejısseri – Qýanysh Stahanov.
Mıýzıkl janryndaǵy «Ar men sezim» kartınasy da bıyl túsirilmek. Týyndy kórermendi ar-namys qasıetin joǵary qoıýǵa, adaldyqqa, adamgershilikke úndeıdi. Jastardyń boıyna ulttyq qundylyqtardy sińirýdi maqsat etip, ulttyq mádenıetimiz ben ónerimizdi nasıhattaıdy. Qazaqtyń atbegilik ónerin jańǵyrtý, ulttyq mýzykasyn jańa qyrynan kórsetýge negizdelgen fılm bolmaq. Prodıýseri – Baqytjan Quljabaev, rejısseri – Batyrhan Dáýrenbekov.
Osy jylǵa josparlanǵan debıýttik fılmder de kınoóndiris salasyna óz daýsymen, óz qoltańbasymen kelmek. Ámir Ámenovtiń «Saǵyndym seni», Aıana Nurdınovanyń «Muǵalim» kórkem kartınalary adamgershilik, izgilik, ustazǵa qurmet syndy adamzattyq murattardy taqyryp etedi.
Sondaı-aq shveısarııalyq saıahatshy, jazýshy Ella Maııardyń Túrkistan dalasyna sapary sýretteletin Qanat Tórebaıdyń «Týrkestan-Solo» derekti fılminiń túsirilim jumysy da óz kezegin kútip tur.
Balalar aýdıtorııasyna arnalǵan kontentke de erekshe mán berilip otyr. Janat Jaılybaıdyń «Adamzatqa izdeý salamyn» anımasııalyq fılmi jasandy ıntellektiniń múmkindikterin kórsetpek. Týyndy kishkentaı kórermenge adamdar arasyndaǵy jyly qarym-qatynasty, tabıǵatqa ińkárlikti kórsetkisi keledi. Al Ámirjan Qazıevtiń «Jibek» anımasııalyq fılminde Shyǵys pen Batys arasyndaǵy mádenı baılanys baıandalady.
Sondaı-aq debıýttik fılmder qatarynda Tatıana Shıshkınanyń «Batyl bol» anımasııasy da túsirilmek. Bul fılmde til máselesi qaýzalyp, elimizdegi bereke-birlik syndy ulttyq uǵymdar kóteriledi.
Iá, bul túsirilim jumysy bıyl ótetin týyndylardyń bir bóligi ǵana. Ekranǵa shyǵatyn basqa da jańa fılmder qoǵamdy tolǵandyrǵan taqyryptardy qamtıdy.
