Sýret: egov.kz
Ataýly áleýmettik kómek 2019 jyldan beri jan basyna shaqqandaǵy tabysy kedeılik sheginen tómen otbasylarǵa berilip keledi. Memlekettik qoldaýdyń bul túri muqtaj otbasylarǵa jan-jaqty qoldaý kórsete otyryp, turmysyn túzep, eńse kóterip el qataryna qosylyp ketýine yqpal etýdi kózdeıdi.
Jumyspen qamtamasyz etýdi úılestirý jáne áleýmettik baǵdarlamalar basqarmasynyń málimetinshe, búginde oblysta jalpy sany 10247 adam turatyn 2356 otbasy AÁK alady. Basqarma basshysynyń orynbasary Maksım Ýstınovtiń aıtýynsha, atalǵan kómek otbasynyń nemese jeke adamnyń áleýmettik jaǵdaıyna baılanysty shartty, shartsyz bolyp eki túrge bólinedi. Shartsyz aqshalaı kómek eńbekke qabiletsiz, tabysy tómen adamdarǵa, otbasylarǵa aı saıynǵy tólem túrinde berilip turady. Shartty aqshalaı kómek eńbekke qabiletti jalǵyzilikti adamdarǵa, sondaı-aq muqtaj otbasylarǵa beriledi. Sońǵy atalǵan AÁK túrin alatyn azamattyń jumysqa ornalasýyna jergilikti ákimdik járdemdesedi. Osyndaı keshendi kómek sharalarynyń nátıjesinde, ótken jyly AÁK alatyn 1687 otbasy eńbekke belsendi aralasyp, turmysyn túzep alǵan.
«Byltyr eńbekke qabiletti 2299 AÁK alýshynyń ishinde 1445 adamnyń bizge júgingen kezde óz jumysy boldy. 680 adam kisi kútimimen otyrdy. 174 azamat jumysymyz joq dep keldi. Áleýmettik kelisim-shart nátıjesinde 530 adam belsendi eńbekke tartyldy. Onyń 85,3 paıyzy, ıaǵnı 452-si turaqty jumysqa ornalasty», deıdi M.Ýstınov.
Sala mınıstrligi bıyldan bastap ýchaskelik komıssııalardyń jumysyn sıfrlandyrýdy josparlap otyr. Qazir komıssııa AÁK taǵaıyndamas buryn aldymen otbasynyń materıaldyq jaǵdaıyn baǵalap alyp, ol málimetterdi qaǵazǵa hattaıdy. Oǵan biraz ýaqyt ketedi. Bul úderisti avtomattandyryp, ońaılatý maqsatynda qańtar aıynan bastap «FSM Social» mobıldi qosymshasy iske qosylmaq. Komıssııa músheleri osy qosymsha arqyly otbasy týraly málimetterdi engizip, qorytyp, ony komıssııanyń basqa múshelerine qol qoıdyrýǵa jibere alady.
Sonymen qatar qańtardyń birinen bastap aldyn ala kelisim boıynsha AÁK alýǵa úmitker azamattyń banktegi esepshoty, ıpotekalyq nesıege jatpaıtyn banktik boryshtarynyń bar-joǵy tekseriledi.
«Azamattar AÁK alýǵa ótinish bergen kezde joǵaryda atalǵan jobaǵa qatysýǵa kelisimin bildirip, qolyn qoıady. Odan keıin otbasynyń kámeletke tolǵan múshelerine 1414 nómirinen SMS habarlama keledi. Oǵan bir jumys kúni ishinde jaýap berilý kerek. Bul derekter ótinish berýshi kelisim bergende ǵana memlekettik aqparattyq júıeler arqyly jınalady», deıdi M.Ýstınov.
Qostanaı oblysy
