Komıssııa jazataıym oqıǵaǵa jumys berýshisi – mektep dırektorynyń buıryǵy sebep bolǵanyn anyqtady. Al endi zańǵa sáıkes jábirlenýshige keltirilgen shyǵyndy ózi óteýge mindetti.
«Jumys berýshi 100% kináli, Qýat Aıtqalıevtiń kinási joq. Sondyqtan komıssııa osyndaı sheshim qabyldady. Qazirgi ýaqytta muǵalimge jalaqysy tólenip jatyr. Eger ol aqyly negizde emdelse, ketken barlyq shyǵyndy óteıdi», dedi Memlekettik eńbek ınspeksııasy jónindegi departamentiniń bólim basshysy Toqtarbek Túsipbaev.
Qazirgi ýaqytta is qyzmettik ókilettigin teris paıdalaný faktisi boıynsha odan ári sheshim qabyldaý úshin quqyq qorǵaý organdaryna jiberildi. Muǵalim úıde em qabyldaýyn jalǵastyryp jatyr, onyń jazylýyna kóp ýaqyt kerek.
«Hattama jasalyp, barlyq tıisti qujat toltyryldy. Qazir materıaldar quqyq qorǵaý organdaryna jiberilip jatyr. Qylmystyq kodekstiń 156-babyna sáıkes, eńbekti qorǵaý erejelerin buzǵany úshin jumys berýshi jaýapty bolady», dedi Toqtarbek Túsipbaev.
Eske salaıyq, oqıǵa jańa jyl aldynda Semeıde bolǵan. Qalalyq shyrshany bezendirý kezinde ustazdardyń biri jaraqat alyp, aýrýhanaǵa jetkizildi. Tergeý nátıjesinde mektep dırektoryna qatań sógis jarııalanyp, qalalyq bilim bóliminiń basshysy qyzmetinen bosatyldy.
