Atalǵan telejobaǵa Mádenıet jáne aqparat mınıstrligi, Oqý-aǵartý mınıstrligi, Ǵylym jáne joǵary bilim mınıstrligi men Parlament Májilisi qoldaý kórsetip otyr.
Intellektýaldyq oıyn – elimizdiń bolashaq kóshbasshylaryn tárbıeleýge baǵyttalǵan jastar qozǵalysy. Qazirgi ýaqytta júzdegen daryndy oqýshy shaqyrtýdy qabyldap, oıynǵa qatysýǵa daıyndalyp jatyr. Ár oblystaǵy irikteý kezeńderi byltyr qazan aıynda bastalyp, naýryzǵa deıin jalǵasady. О́ńirlerden iriktelgen eń úzdik bes oqýshy sáýir-maýsym aralyǵynda ótetin respýblıkalyq kezeńge qatysa alady.
Aıta keteıik, jas daryndardyń bilimderi men qabiletterin halyqqa kórsetýge múmkindik beretin televızııalyq joba «Habar» agenttiginiń 30 jyldyǵyna oraı ótkizilip otyr. Eń úzdik úsh jeńimpazǵa elimizdiń joǵary oqý oryndarynda oqýǵa granttar tabystalady.
Búginde Pavlodar, Qaraǵandy, Abaı, Aqmola, Túrkistan, Jambyl, Batys Qazaqstan, Shyǵys Qazaqstan, Ulytaý, Qyzylorda, Atyraý jáne Mańǵystaý oblystarynan, sondaı-aq Astana men Shymkent qalalarynan respýblıkalyq týrǵa qatysatyn úzdik bestikter anyqtalyp úlgergen. Almaty, Aqtóbe, Jetisý, Soltústik Qazaqstan, Qostanaı oblystarynda jáne Almaty qalasynda irikteý kezeńderi qańtar-aqpan aılarynda ótedi.
«XXI ǵasyr kóshbasshysy» – jas daryndarǵa jańa múmkindikter beretin biregeı alań. Intellektýaldyq oıyn bilimdi ári talantty jastardy qoǵamǵa tanystyryp qana qoımaı, shalǵaı eldi mekenderden shyqqan daryndy jasóspirimder úshin taptyrmas múmkindik ekeni sózsiz.
Eske salsaq, telejoba alǵash ret 25 jyl buryn ekranǵa jol tartqan edi. Osy ýaqyt ishinde otandyq televızııadaǵy úzdik jobalardyń biri retinde tanyldy. Búginde bilimdiler saıysyna qatysqan kóptegen jas óz joldaryn taýyp, túrli salalarda kásibı mamanǵa aınaldy.
