Týǵan eliniń ár ólkesin shynaıy beıneleıtin sýretshi óz týyndylarynda ýaqyt pen bolmystyń áserli qubylystaryn erekshe dınamıkalyq yrǵaqpen jetkizedi. Qylqalam sheberiniń palıtrasy kúrdeli bolǵanmen, kórermen úshin sıýjettik kompozısııany jeńil qabyldaýyna múmkindik beredi. Aıtalyq, «Aqjar», «Týǵan jer – Beriktas», «Jarkent. Ile ózeni», «Sýyqsaı», «Tekeli taýy», «Keles ózeni», «Kamenka plato» atty týyndylary qorshaǵan álemniń erekshe sulýlyǵyn qanyq jáne kereǵar tústerdi úndestire, ózara úılestire, tabıǵattyń qas-qaǵym sátin máńgilikke aınaldyrady.
«Peızaj janrynda ol kórgenin jazyp qana qoımaı, týǵan ólkeniń tabıǵatyn zerttep, názik ıirimin anyq ári ásem beıneleı otyryp, tamashalaǵan adamnyń áserli sezimde sol atmosferany qabyldaýyn jáne este saqtaýyn kózdeıdi. Sýretshi-peızajıst kúndelikti qozǵalystaǵy qubylystyń bir sátke ýaqytty toqtatyp, sol sáttegi sheksiz keńistiktiń máńgilik qundylyǵyn sezinýge múmkindik beredi. Sondyqtan da tabıǵattyń tylsym qubylysyn kórý, seziný jáne áserli jetkizý – sýretshi úshin mańyzdy sát» deıdi sýretshi kórmesiniń ereksheligimen tanystyrǵan ónertanýshy, Mýzeı pedagogıkasy jáne ekskýrsııa qyzmeti bóliminiń jetekshisi Gúlnar Jubanııazova.
Marat Toteev portrettik janrda da óziniń ereksheligin tanytady. Ol reńkter, tekstýra, jaryq arqyly adam kelbetiniń naqtylyǵyna ǵana emes, beıneniń ishki álemin, sezimin kórsetýge erekshe mán beredi. Shyǵarmashylyǵynda portrettik jumystary arqyly tarıh betin qaıta paraqtaýǵa úndeıtin týyndylarynyń ózi bir shoǵyr. Kórmede óz zamanynda ozyq týǵan, biraq tarıhta esimi atalmaı qalǵan belgili tulǵalardyń biri, áskerı qyzmet atqarǵan etnograf, tarıhshy Ǵazy Bolatuly Ýálıhannyń, Shoqan Ýálıhanovtyń jubaıy Aısara Kóshenqyzynyń portreti qoıylǵan. Sýretshi tarıhı tulǵalardyń beınesin kenep ústinde keskindeı otyryp, sol ýaqyt belesiniń aqıqatyn kórsetkisi keledi.
Sýretshi Marat Muhamedqalıulynyń týyndylary Qyrǵyzstan, Túrkııa, Germanııa, Amerıka, Úndistan kolleksıonerleriniń qorynan oryn alady.
ALMATY
