Sýretti túsirgen – Erlan OMAR, «EQ»
Sondaı-aq eki el banktiń búkil álemdegi ınvestısııalyq baǵytynda besinshi jáne altynshy oryndardy alyp otyr. EQDB Tájikstanǵa – 52 mln, Qyrǵyzstanǵa 52 mln jáne Mońǵolııaǵa 264 mln eýro salǵan.
«Bank qarajatynyń 61%-y ornyqty ınfraqurylymdyq jobalardy qoldaýǵa baǵyttalǵan. 24% kredıt shaǵyn jáne orta bıznesti, áıelder men jas kásipkerlerdi qarjylandyrý maqsatynda jergilikti bankterge berilgen. Sonymen qatar resýrstardy tıimdi paıdalaný jáne klımat ózgerisine ornyqtylyq boıynsha da nesıe usynylǵan. Qalǵan 15% nesıe korporatıvti sektor klıentteriniń enshisine tıdi», dep málimdeıdi bank.
2024 jyly banktiń Qazaqstandaǵy jıyntyq ınvestısııasy 10 mlrd eýrodan asyp túsken. О́zbekstanda 5 mlrd eýroǵa jetken. Tájikstan men Qyrǵyzstan bankten 1 mlrd dollardan astam qarjy tartqan.
EQDB ınvestısııa quıǵan elimizdegi aýqymdy jobalar qatarynda Aqtóbe qalasyndaǵy jańa tazartý qurylystary jáne soǵan baılanysty ınfraqurylymdy salý bar. Oǵan bank 96,4 mln eýro táýelsiz nesıe usyndy. Sonymen birge Qaraǵandy oblysyndaǵy grafıt ken ornynda jumys isteıtin jáne aksııasy Aýstralııa qor bırjasynda saýdalanatyn «Sarytogan Graphite Limited» kompanııasynyń 17,36% aksııasyn ıelendi. Aksııalardy bastapqy ornalastyrý aıasynda «Air Astana» áýe kompanııasynyń aksııalaryna 42 mln dollar qarjy quıdy.
EQDB-nyń jańa qarajaty Qazaqstan men О́zbekstandaǵy ulttyq jeli operatorlarynyń turaqtylyǵyn arttyrýǵa jáne jańartylatyn energııa kózderin biriktirýge járdemdesý úshin paıdalanyldy. Bank 252 mln eýro kóleminde qarjy usyndy. KEGOC 500 kV-ǵa negizdelgen 600 km ınfraqurylym jelisiniń qurylysyna jáne Batys Qazaqstannyń energojúıesin Biryńǵaı energojúıemen ıntegrasııalaýǵa 66,4 mln dollar bólgen.
Al áleýmettik ınfraqurylym sektorynda bank bizdiń eldegi alǵashqy iri memleket-jekeshelik áriptestigi jobasynyń negizgi demeýshisi boldy. Onyń aıasynda 365 mln eýrony alty birdeı qarjy ınstıtýty Kókshetaý qalasynda 630 orynǵa laıyqtalǵan kópprofıldi aýrýhanany salý jáne paıdalanýǵa berýge jumsaýy qajet.
Sondaı-aq bank Ortalyq Azııadaǵy iri ınstıtýsıonaldyq ınvestor bolyp sanalady. Qazirge deıin 1 163 jasyl jáne ınklıýzıvtik jobalarǵa 21,5 mlrd eýro qarjy bólgen.
