Atalǵan is-shara «Mádenıet arqyly únqatysý» jobasy aıasynda uıymdastyrylyp, PIB Prezıdenttik ortalyǵynda bıylǵy kórme maýsymyn ashty. Flıýıd-art tehnıkasy men abstrakty beıneleý baǵytynda keń tanylǵan Álı Aqjannyń eńbekteri kóptegen respýblıkalyq jáne halyqaralyq kórmede qoıylyp júr. Atap aıtsaq, Sýret akademııasynyń, О́ner akademııasynyń halyqaralyq kórmelerinde, sondaı-aq «Astana Finance Days», «Álemniń jaryǵy», «Túrki áıelderiniń zergerlik áshekeıleri», «Sheksiz ǵarysh», «13 metamorfoza» kórmelerinde usynylǵan. Búginde sýretshi týyndylary elimizden bólek Aýstrııa, Germanııa, Japonııa, Nıderlandy Koroldiginiń jáne Marokkonyń jeke kolleksııalarynda saqtaýly.
Al Djerald Florıan Messnerdiń shyǵarmalary BAÁ, Aýstrııa, Qytaı jáne Qazaqstan kórmelerinde qoıylǵan. О́zi ǵalym, ózi doktor, jazýshy hám ánshi úshin bul qabiletteri bir-birimen tyǵyz baılanysty.
«Kórme avtorlary Prezıdent ortalyǵynyń bıylǵy kórme maýsymyn ashý qurmetine ıe boldy. Bul joba Qazaqstan men Aýstrııa arasyndaǵy mádenı baılanystardy odan ári damytýǵa jáne nyǵaıtýǵa septigin tıgizetinine senimdimiz. «Biz birgemiz!» degen ataý túrli elden kelgen mádenıeti ártúrli, ómirge kózqarasy bólek eki sýretshini biriktirgen tereń fılosofııalyq habardy beıneleıdi. О́ner arqyly kez kelgen shekter men sheńberler joıylyp, eki sýretshiniń dıalogi bizdi shyǵarmashylyqtyń tańǵajaıyp álemine batyrady. Biz bul vernısajdy birlik pen jasampazdyqtyń nyshanyna aınalǵan Qazaqstan halqy Assambleıasynyń 30 jyldyǵyna arnadyq», dep atap ótti Prezıdent ortalyǵy dırektorynyń orynbasary Botagóz Qaıypova.
О́z kezeginde Aýstrııa Respýblıkasynyń Qazaqstan Respýblıkasyndaǵy elshisi, sonymen qosa Qyrǵyz Respýblıkasy men Tájikstan Respýblıkasyndaǵy atqarýshy elshisi Andrea Baher de sóz aldy.
«Men elshi laýazymyna jaqynda ǵana taǵaıyndaldym. Qyzmetimdegi alǵashqy is-shara, elderimiz arasyndaǵy ekijaqty yntymaqtastyqty odan ári nyǵaıtýǵa arnalǵan osyndaı mańyzdy mádenı jıyn bolǵanyna qýanyshtymyn», dedi ol.
Búginde sıfrlyq tehnologııalar jáne jahandaný dáýirinde, adamdar arasyndaǵy baılanystar alshaqtap bara jatqan álemde ómir súrip jatqanymyz ras. Bir ıdeıaǵa toǵysqan eki sýretshi – álemge degen eki kózqaras. «Biz birgemiz!» kórmesi – sózben jetkize almaıtyn kórinisterdi beıneleıtin óner ǵana ekendiginiń taǵy bir dáleli. Mundaǵy árbir jumys ómirdiń túrli sıýjetterinen quralǵan mozaıkanyń erekshe fragmenti syndy.
«О́z oıym men sezimimdi beıneleıtin týyndylarymdy usyný – men úshin úlken mártebe. Árbir kartına – meniń jolymnyń tarıhy. Djerald Florıan Messnermen birlesken kórme shamamen úsh aı buryn pisip-jetildi. Maqsaty – ártúrli el, ár tolqyndaǵy urpaqtar sýretshileriniń jumystaryn kórsetý, kózqarasyn baıqatý. Bul kórme kelýshilerdi mádenı ártúrlilikpen tanystyrýǵa jáne avtorlardyń shyǵarmashylyq izdenisin sezinýge tamasha múmkindik ekeni sózsiz. Búgingi is-shara árkimge ózi týraly, jalpy álem týraly jańa dúnıeni ashýǵa múmkindik beredi», deıdi Aqjan Álı.
Ekspozısııada Álı Aqjannyń 25 týyndysy jáne Florıan Messnerdiń 27 týyndysy usynylyp otyr.
Aıta keteıik, kórme 24 aqpanǵa deıin jumys isteıdi.
