Máselen, «Bir el – bir kitap» atty kórmeniń ashylý rásiminde bıyl proza janry boıynsha kópshilik daýyspen kórnekti jazýshy Táken Álimqulovtyń shyǵarmalaryn oqý usynylǵany, poezııa janry boıynsha qazaqtyń birtýar aqyny Jumeken Nájimedenovtiń shyǵarmalary tańdalǵany týraly aıtyldy. Kórmege atalǵan qalamgerlerdiń shyǵarmashylyǵy men ómir joly týraly derekter, kóptegen fotoqujattar qoıylǵan.
Is-shara aıasynda uıymdastyrylǵan «Sherli jyldar shejiresi» atty kórmeden áıgili «Qazaq» gazetiniń 1913–1918 jyldardy tolyq qamtıtyn 7 tomyn, «Aıqap» jýrnalynyń qos jınaǵyn, 1917–1919 jyldary Semeıde shyǵyp turǵan «Saryarqa» gazetiniń basylymdaryn qarap, tanysýǵa bolady.
«Al «Ataýly kúnder» atty kitap kórmesinde Abaıdyń «Qara sózderi», 160 jyldyq tarıhy bar «Qozy Kórpesh Baıan sulý», 110 jyl buryn jazylǵan S. Toraıǵyrovtyń «Kim jazyqty?» romany, sol sııaqty orys tiline aýdarylǵanyna 155 jyl tolǵan «Er Tarǵyn» dastany, A.S.Pýshkınniń osydan 205 jyl buryn jazylǵan «Rýslan ı Lıýdmıla» poemasy oqyrmandar nazaryna usynyldy», deıdi kitaphana meńgerýshisi Altyn Erjanova.
Kitap merekesi barysynda «Ulttyq óner – urpaqqa mura» atty qolóner kórmesi uıymdastyryldy. Sondaı-aq áshekeı buıym jasaýdyń qyr-syryn ashyp kórsetken sheberlik synyby ótti.
Búginde Sadchıkov kitaphanasynda «Qazyna», «Istokı», «Pochemýchka» atty úsh klýb jumys isteıdi. Mysaly, «Qazyna» klýbyna kileń ánshi, ismer zeınetkerler bas qosqan. Ashyq esik kúni aıasynda atalǵan klýbqa múshe ájeler qyzdarǵa arnap jasaǵan shekelik, shashbaý, sholpy tárizdi áshekeı buıymdaryn kórsetip, olardyń tárbıelik mánin túsindirdi. Al «Istokı» klýbynyń músheleri kópshilikke túrli emdik shópten jasalǵan shaı quıyp berip, onyń densaýlyqqa paıdasyn, mundaı shaıdy qalaı daıyndap, qalaı demdeý kerek ekenin baıandap berdi.
Is-shara sońynda «Qazyna» klýbynyń músheleri «Keshir, Ana!» atty otbasylyq tárbıelik mánge ıe qoıylymdy sahnalady.
Qostanaı oblysy
