Imanáliniń robottehnıkaǵa degen qyzyǵýshylyǵy 7-synypta bastalǵan. Sonyń ishinde halyqaralyq «First Global Challenge» (FGC) baıqaýyna qatysýy onyń bul baǵytqa degen qushtarlyǵyn eseleı túsken. «Sıngapýrdaǵy FGC – 2023-te ınjener bolýdan bólek, matchtar kezinde júrgizýshi boldym jáne robotty basqardym. Bul streske tózimdilikti qajet etedi. Jarysta 194 eldiń arasynda óner kórsetip, birinshi oryn aldyq. Bul komandanyń aýyzbirshiligi, tabandylyǵy men tynymsyz eńbektiń nátıjesi ekenin kórsettik», deıdi Imanáli.
Dál sol ýaqytta Qazaqstan quramasy robottehnıka boıynsha ekinshi ret álem chempıony atanǵan edi. Daryndy oqýshy ınnovasııalyq jobalardy ázirleýmen de belsendi aınalysyp júr. Máselen, ol estý qabileti nashar adamdarǵa arnalǵan aqyldy saǵat jasap shyǵardy. «Bul saǵat estý qabileti nashar adamdarǵa vıbrasııa arqyly kúmándi nemese qaýipti dybystar týraly eskertý beredi. Men muqtaj adamdardyń ómirin jaqsartatyn tehnologııany jasaǵanymdy maqtan tutamyn», deıdi 17 jastaǵy chempıon.
Imanáli bolashaqta elimizdiń tehnologııasy men ekonomıkasyn damytýǵa úles qosqysy keledi. Sondyqtan Pensılvanııa ýnıversıtetin tańdap otyrǵanyn jetkizdi. «Wharton School» bıznes mektebi álemde birinshi orynda bolǵandyqtan osy ýnıversıtetti tańdadym. Ýnıversıtet tek bilim berip qana qoımaı, stýdentterdiń áleýmettik ómirin damytady, bul maǵan óte mańyzdy. Men alǵan bilimimdi óz elimniń damýyna paıdalaný úshin joǵary oqý ornyn bitirgennen keıin elime oralýdy josparlap otyrmyn. Meniń oqıǵam jastardy óz armandaryna umtylýǵa jáne eshqashan berilmeýge shabyttandyrady dep úmittenemin», dedi I.Kóksal.
