Rınat Zaıtov tıisti ınfroqurylymnyń, sapaly medısına men bilimniń, turaqty jumys pen tabystyń joqtyǵynan halqymyzdyń kóp bóligi «altyn besigin» amalsyzdan tastap ketkenin tilge tıek etti. Sonyń saldarynan keıingi 55 jylda ShQO-da 350 aýyl, SQO-da 635, Pavlodar oblysy boıynsha 352 aýyl bos qalsa, bıyl SQO-da 141 aýyl mártebesinen aıyrylǵanyn atap ótti.
«Búgin de aýyl turǵyndary óz kúshimen qandaı da bir is bastaıyn dese de kedergiler óte kóp, mal baǵyp, egin ósireıin dese, jeri, kásip bastaıyn dese, qarjysy, qajetti ınfroqurylymy da joq. Turǵyndaryn bylaı qoıyp, aýyldyń ákiminde de qarapaıym qajettilikterdi óteıtin bıýdjette tehnıka da, pármen de joq. Aýyldardy osyndaı kúıge jetkizgen soń, aýyl halqyna nege kóshtiń dep qaı betimizben aıtamyz? «Arqada aıaz bolmasa, arqar aýyp nesi bar» degendi bárimiz biletin shyǵarmyz?», dedi ol.
Osyny aıta kele Rınat Zaıtov Premer-Mınıstrge tómendegi usynystardy jetkizdi:
- Aýyl ákimderiniń pármenin kúsheıtý;
- Aýyldardy tehnıkamen qamtý;
- Úkimet basshylyǵy jáne oblys ákimderi deńgeıinde qonys aýdarý jónindegi memlekettik komıssııa qurý;
- Aýyldyq jerlerge jastardy turaqtandyrý jáne qonystandyrýǵa baǵyttalǵan jumys josparyn qurý, ony aýyldyq jastarǵa jetkizý.
