Baıanaýyl týraly beıneaqparat izdegen kópshilik Instagram-daǵy @bayanaul_vibe paraqshasyna úńiletinin jıi baıqap júrmiz. Munda Arqadaǵy erekshe jaratylys, tasyn túrtseń tarıhy sóıleı jóneletin qutty mekenniń tabıǵaty, kúmisteı jarqyraǵan kólder, taýmen talasa ósken orman-toǵaı, Aqbettaýdyń baýraıyn meken etken jabaıy janýarlar, taǵysyn-taǵy tabıǵat ǵajaıyptaryn tamashalaýǵa bolady.
Osynyń barlyǵyn erinbeı-jalyqpaı telefon kamerasyna túsirýge daǵdylanǵan Taısııa Naýmova búginde aýdan ortalyǵynda Shapyq Shókın atyndaǵy №2 orta mektepte oqý isiniń meńgerýshisi qyzmetin atqarady. Aıtýynsha, bala shaǵynan tabıǵatqa ańsary aýyp turady eken. Týǵan jerge degen súıispenshilik pen qorshaǵan ortaǵa qamqorlyq ony osydan birneshe jyl buryn mobılografııa salasyna alyp kelgen. Ol kásibı mobılograf emes. Degenmen jumystan bos ýaqytynda týǵan jeriniń ásem jerlerine arnaıy baryp, telefonynyń kamerasyna túsirip alýdy kúndelikti ádetine aınaldyrǵan. Keı rolıkterge ózi mánerlep oqyǵan óleńderiniń aýdıosyn qosa usynady.
– О́zim Toraıǵyr aýylynyń týmasymyn. Ultym orys bolsa da, janym qazaq. Qazaq halqy tabıǵatqa, qorshaǵan ortaǵa jaqyn bolatynyn baıqaımyn. Meniń jan álemim de sony qalaıdy. Kishkentaı shaǵymnan týǵan aýylymdaǵy Qandyaǵash toǵaıy, Áýlıebulaqqa tóngen Sáken jary, taý baýraılary, jartastarda sekirip júretin arqarlar meni erekshe qyzyqtyratyn. Onyń ústine bizdiń jerden Edige, Shorman bıler, kórnekti aqyn Sultanmahmut Toraıǵyrov, qazaq mýzyka aspabyn jasaýdyń sheberi Qamar Qasymov sııaqty tanymal tulǵalar shyqqan. Osyndaı qasıet qonǵan ólkede turyp, týǵan jerdi maqtan etpeý múmkin emes. Qorshaǵan ortanyń sulýlyǵyn kóre bilýge, ony aıalaýǵa adamı túısik kerek. Kórikti jerlerdi kameraǵa túsirip, áleýmettik jelide bólissem, ony ózge adamdar kórip, tam-tumdap málimetter alyp jatsa, men úshin ǵanıbet, – deıdi ol.
Taısııa Naýmova
Qazirgi ýaqytta bul oıynyń durys bolǵanyna kózi jetip otyr. Eki jyl ishinde paraqshasyna jazylýshy sany kóbeıe bastaǵan. Keıde turaqty kórermenderi pikir jazyp, ana jerdi túsirip qaıtyńyzshy dep ótinish jasaıdy eken. Ondaı adamdardyń meselin qaıtarmaýǵa tyrysady.
– Joldasym ekeýmiz balalarymyzdy da tabıǵatqa súıispenshilikpen qaraýǵa tárbıeleımiz. Kók qyltısa, aýyl shetine shyǵyp, samaýryn qoıyp, demalǵandy unatamyz. Osynyń barlyǵy adamnyń tabıǵatpen etene bolýy kerektigin bildiredi – dep jalǵastyrdy áńgimesin Taısııa.
Aıtýynsha, osydan biraz ýaqyt buryn kúıeýi dron syılapty. Endi sony paıdalanyp, Baıanaýyl tóńiregindegi barlyq aýyldy beınejazbaǵa túsirip, eldi mekenderdi tarıhymen qosa paraqshasynda jarııalamaq nıeti bar. Paraqshadaǵy beınebaıandardan jyldar óte keıingi urpaq ózine qajettisin taýyp, eliniń ótkenin tanıdy dep oılaıdy.
– Jýyqta ataqty qusbegi, KSRO ańshylyq isiniń úzdigi Máýııa Ábikeev atyndaǵy qusbegiler týrnırine qatystym. Meni qyran qustyń ushýy, ańǵa túskeni aıryqsha qyzyqtyrady. Qazaqta ejelden bar saıatshylyq ónerdiń qaıta jańǵyryp, búgingi urpaqqa jalǵasqany, menińshe qýantarlyq dúnıe. Qusbegilikpen jastar kóp aınalysady eken, – dep atap ótti.
О́zi túsirgen beınerolıkterdi keıde sabaq ústinde de paıdalanady. Bul iske oqýshylardy da jumyldyryp, jaqynda «Kóńildi saıahat» dep atalǵan halyqaralyq saıysta ózi úılestirgen balalardyń jumysy 3-oryndy jeńip aldy. «Búginde qymbat telefonǵa áýes balalar kóp. Tek ony paıdaly iske jarata alatyndar az», dep qynjyldy ustaz.
Taısııany Baıanaýyldaǵy týrıstik aımaqtardyń óz aldyna damı almaı otyrǵany da muńaıtady. Jasybaı demalys aımaǵynda qarapaıym ájethanalardyń jetispeýshiligi, servıstiń nasharlyǵy, abattandyrý jumysynyń tómen deńgeıde júrgizilýine turǵyn retinde jany ashıtynyn jetkizdi. Bul osy iske jaýapty organdar men jekelegen laýazymdy tulǵalardyń úılestire almaýynan, jaýapkershilik pen baqylaýdyń álsizdiginen týyndap otyrǵan másele dep oılaıdy. Osy oraıda halqymyzdyń «qalaýyn tapsa, qar janady» degen naqylyn eske saldy.
Pavlodar oblysy, Baıanaýyl aýdany
