Foto: Turizm jane sport ministrligi
Frıstaıl-mogýl
Qazaqstannyń daryndy sportshysy Anastasııa Gorodko Kanadanyń Val-Sent-Kom kýrortynda ótken Álem kýbogi kezeńinde keremet óner kórsetip, kúmis júlde ıelendi. Bul dodada Anastasııa tek tehnıkalyq sheberligimen ǵana emes, sondaı-aq jigerli minezimen de kózge tústi. Sportshynyń bul jetistigi – frıstaıl-mogýl baǵytyn damytýda Qazaqstan úshin mańyzdy qadam.
Konkımen júgirý
Alına Daýranova Italııanyń Kollalbo qalasynda ótken Álem kýbogi kezeńinde sensasııalyq nátıjelerge qol jetkizdi. Ol 1000 metr qashyqtyqta jáne komandalyq sprıntte eki altyn medal jeńip alyp, óziniń konkımen júgirý sportynyń úzdikteri qatarynda ekenin taǵy bir márte dáleldedi. Sonymen qatar, 500 metr qashyqtyqta kúmis medal ıelenip, jankúıerlerdi qýantty. Alınanyń bul jeńisteri qazaqstandyq konkı sporty tarıhyndaǵy jarqyn betterdiń biri bolyp qala bermek.
Taý shańǵysy
Jas sportshy Aleksandra Skorohodova Italııanyń Alpe Chermıs-Kavaleze kýrortynda ótken jasóspirimder arasyndaǵy FIS týrnırinde ekinshi oryndy ıelenip, óziniń bolashaǵy zor sportshy ekenin dáleldedi. Aleksandranyń bul jetistigi Qazaqstannyń taý shańǵysy sportynda da jańa juldyzdardyń paıda bolyp kele jatqanyn kórsetedi.
Ústel tennısi
Qatar astanasy Dohada ótken WTT Youth Contender Doha halyqaralyq týrnırinde 11 jasqa deıingi jas sanatynda óner kórsetken Nazerke Bolatbek altyn medal jeńip aldy. Bul onyń alǵashqy iri halyqaralyq jeńisi bolyp, Qazaqstandaǵy ústel tennısi sportynyń damýyna serpin berdi. Nazerkeniń tabandylyǵy men sheberligi onyń bolashaqta da bıik belesterdi baǵyndyratynyn ańǵartady.
Tennıs
Qazaqstan quramasy Devıs kýbogi sheńberindegi pleı-off kezeńinde Pákistan komandasymen ótken kezdesýde aıqyn basymdyq tanytyp, jeńiske jetti. Bul jeńis qazaqstandyq tennısshilerdiń álemdik deńgeıdegi básekege qabilettiligin kórsetip, el namysyn abyroımen qorǵaǵan sátterdiń biri boldy. Qazaqstandyq tennısshiler ózderiniń kásibı sheberligin dáleldep, jankúıerlerdiń zor senimin aqtady.
