«Qostanaıagroónim» seriktestigine qarasty mal soıý beketinde ótken tájirıbelik bólim barysynda ǴAO mamandary jergilikti veterınarlardyń tiri maldan, sondaı-aq soıylǵan mal men qustan qalaı synama alatynyn tájirıbe túrinde kórip, tekserdi. Mal dárigerleri synama alý kezinde paıdalanylatyn arnaıy kostıým, qolǵap, kózildirik, maska sekildi qorǵanysh kıimderin durys kıip, durys sheshýge jattyqty.
«Is-sharanyń basty maqsaty – zerthanalyq dıagnostıka úlgilerin jınaý, oraý, tasymaldaý jáne óńdeý tájirıbesin jetildirý arqyly sibir jarasy, brýsellez, qus tumaýy jáne pasterellez sııaqty qaýipti aýrýlardy epıdemıologııalyq baqylaýdyń sapasyn jaqsartý. Asa qaýipti indettiń aldyn alý, keseldi tap basyp anyqtaý – eń aldymen, durys alynǵan synamaǵa baılanysty. Synama durys alynbasa ınfeksııalyq aýrý ýshyǵyp ketedi. Qandaı aýrýda qandaı synama alý kerek, ony maldyń qaı jerinen, qaı organdarynan alý kerek, ony qandaı konteınerge jınaý kerek, ony zerthanaǵa qalaı jetkizý kerek, synama alǵanda qandaı qujattar toltyrý kerek degen suraqtarǵa jaýap berdik. Sonymen birge synama alatyn maman qalaı kıiný kerek degen másele de aıtyldy. Mal dárigeri jeke qorǵanysh kıimin durys kıip, durys sheshe bilý kerek. Áıtpese mamannyń ózi kesel juqtyryp alýy múmkin», deıdi ǴAO-nyń ulttyq keńesshisi Erbol Qamsaev.
Oblystyq Veterınarııa basqarmasynyń basshysy Tólegen Imanbaevtyń aıtýynsha, óńirde mal dárigerleriniń bári synama alýdy jaqsy biledi. Alaıda jyl saıyn olardyń biliktiligin arttyryp, kásibı daǵdysyn shyńdap otyrǵan durys.
«О́ńirde mal basy jyl ozǵan saıyn kóbeıip jatyr. Shetelden de mal ákelinip jatyr. Olardyń óz aýrýlary bar. Ony da dereý anyqtaýymyz qajet. Qara maldyń ózinde brýsellez, sibir jarasy, aýsyl tárizdi aýrý kóp taralady. О́tken jyly oblysta mal aýrýynyń otyz shaqty oshaǵy tabylsa, bıyl bizdiń dárigerlerdiń shıraq qımylynyń arqasynda ony beseýge deıin tómendettik. Mamandar sapaly jumys istese, kez kelgen aýrýdyń aldyn alýǵa bolady. Mundaı trenıngter sol úshin óte qajet», deıdi Tólegen Imanbaev.
Arqa aýylyndaǵy veterınarlyq pýnkttiń meńgerýshisi Saǵynysh Demesinova mundaı trenıngten bizdiń de alarymyz kóp, keıingi jastar da bilimin jetildire túsedi deıdi.
«Osyndaı sharalar arqyly óz kásibimizdi meılinshe jetildire tússek, odan eshkim utylmaıdy. Ras, kez kelgen mal aýrýynyń aldyn alsa, mal ónimderiniń sapasyna da kepildik berýge bolady», deıdi maman.
Qostanaı oblysy
