Aıta keteıik, bıyl Ulttyq kınony qoldaý ortalyǵy janyndaǵy saraptama keńesiniń quramy jańartyldy. Oǵan kıno, ádebıet, mádenıet salasyndaǵy mamandar, sondaı-aq Májilis depýtattary kirdi.
Kezdesý barysynda kınojobalardy konkýrstyq irikteý erejeleri talqylandy. Mınıstr Ulttyq kınony qoldaý ortalyǵynyń qyzmeti týraly egjeı-tegjeıli aıtyp, saraptama keńesi múshelerine úlken jaýapkershilik júkteletinin atap ótti. О́tken jyly qabyldanǵan irikteý konkýrsy erejelerindegi ózgerister bul úderistiń ashyq ári jeńil ótýine baǵyttalǵan edi.
Jańa erejelerge sáıkes, irikteý eki kezeńnen turady. Alǵashqy kezeńde saraptama keńesi tek ssenarııler men ssenarıı josparlaryn saralaıdy. Birinshi kezeńnen sátti ótken ssenarıılerdiń avtorlary ekinshi kezeńde tolyq qujattaryn usynýy kerek. Úmitkerler qajetti qujattardy tapsyrǵannan keıin onda anyqtalǵan qatelerdi túzetýge úsh kún ýaqyt beriledi. Qujattardy qabyldaý aıaqtalǵan soń, Ortalyq saraptama keńesiniń qaraýyna ótinim jiberedi. Sodan keıin pıtchıng kúni belgilenedi.
«Keńes músheleri jaýapkershilikti tereń sezinip, konkýrstyń barlyq kezeńderinde ádil sheshim shyǵaryp, ashyq konkýrs ótkizýge tıis. Kınojobalardyń belgilengen talaptarǵa sáıkes bolýyna basa nazar aýdarylady. Bul is-sharalar otandyq kıno salasyn damytýǵa, sondaı-aq ulttyq múdde men ıdeologııaǵa saı keletin jobalar sanyn arttyrýǵa kómektesedi», dedi Aıda Balaeva.
Bıyl ulttyq qundylyqtar, otbasy, qorshaǵan ortany qorǵaý, zań men tártip, tarıhı eleýli oqıǵalar, dos qadiri, áıel quqyǵy, bala qaýipsizdigi, qazirgi zamannyń qaharmandary, el birligi jáne basqa da basym taqyryptarda kınojobalar daıyndaýǵa bolady. Sondaı-aq bıyl mınıstrliktiń jáne Ulttyq kınony qoldaý ortalyǵynyń qoldaýymen 10 jańa fılm jaryq kóredi. «Kapıtan Baıtasov», lýdomanııa taqyrybyn qozǵaıtyn «Igromanka» atty drama, fýtbol týraly «90+1» sporttyq dramasy, sondaı-aq «Kúzgi samal», «Feıkovyı arman», «Qaitadan», «Tezek», «Qara qyz», «Altyn adam», «Hosh ıisti júrek» jáne «Avel» fılmderi jaryqqa shyǵady.
