Sýretti túsirgen – Nurǵalı JUMAǴAZY
Frıstaıl-akrobatıkadan erler quramasy Qytaıdaǵy qysqy alamanda top jardy. Sherzod Hashırbaev pen Roman Ivanov basty qarsylastaryn qapy qaldyrdy. Bul altyn medaldyń tarıhı mán-mańyzy aıryqsha. Jigitterimiz sınhrondy sekirýde 97,92 upaı jınap Azııa rekordyn jańartty.
Azııa oıyndary Harbınmen qatar Iаbýlı qalasynda da ótkizilip jatyr. Iаbýlıdiń taý bókterinde bıatlon, shańǵy jarysy, taý shańǵysy, skı-alpınızm, frıstaıl akrobatıka sportynan saıystar uıymdastyrylǵan.
– Frıstaıl-akrobatıkadan sınhrondy sekirýde qysqy Azııa oıyndarynyń chempıony atandyq. Buryn-sońdy osy saıys túrinen altyn medal buıyrǵan joq. Birinshi sekirgende Roman ekeýmizdiń akrobatıkalyq ádisimiz oıdaǵydaı bolmady, qımylymyz birdeı kóringen joq. Odan keıin bapkerler abdyramaýdy, qatelikke boı aldyrmaı oryndaýdy shegelep tapsyrdy. Oqý-jattyǵý kezinde jasap júrgen ádis. Sony taǵy da qateliksiz oryndadyq, – dedi Sh.Hashırbaev.
Áıelder arasyndaǵy saıysta frıstaıl-akrobatıkadan sınhrondy sekirýde Ardana Mahanova men Aıana Joldas qysqy Azııa oıyndarynyń qola júldegeri atandy.
Shańǵyshy akrobattardyń jeńisine jeńis ústegen shańǵyshylar da jankúıer senimin aqtaı bildi. Bıatlonnan 10 shaqyrymdyq sprıntte Vladıslav Kıreev altyn medal enshilese, taǵy bir sańlaq Vadım Kýrales kómbege ekinshi jetip, kúmis júlde ıelendi. Qalǵan shańǵyshylar da ondyqqa endi: Áset Dúısenov 6, Aleksandr Mýhın 7-oryndy mise tutty.
– Qysqy Azııa oıyndaryna tek altyn medal oljalaý úshin keldik. Alda áli komandalyq saıys bar. Jekeleı jarysta jeldiń qarsy uıtqýy da jyldamdyqty tejep, aıtarlyqtaı kedergisin tıgizdi. Jer baýyrlaı jatyp nysanany kózdeýde qatelik jiberdim, jel ekpini oqtyń baǵytyn sál buryp jiberdi. Al tik turyp nysana kózdeýde barlyq múmkindikti múlt jibermedim, – dedi V.Kıreev.
Azııa oıyndaryna sportshylarymyzdy qoldaýǵa arnaıy barǵan Ulttyq Olımpıada komıtetiniń prezıdenti Gennadıı Golovkın men Týrızm jáne sport mınıstri Erbol Myrzabosynov sańlaqtardyń jetistigi uıymshyldyqpen atqarylǵan eńbektiń nátıjesi ekenin atap ótti.
– Frıstaıl-akrobatıkadan otandastarymyz Sherzod Hashırbaev pen Roman Ivanov Azııa oıyndarynyń chempıony atandy. Erler arasyndaǵy sınhrondy sekirýde synǵa túsken jerlesterimiz ekinshi múmkindikterinde bar sheberlikterin kórsetip, azýly Qytaı quramasynyń altynnan úmitti eki quramyn da basyp ozdy. Bul medaldyń elimiz úshin mańyzy zor. Bul – qysqy Azııa oıyndary tarıhynda otandastarymyz frıstaıl-akrobatıkadan jeńip alǵan tuńǵysh altyn medal. Osy jeńiske úles qosqan jattyqtyrýshylar men komandanyń eńbegin erekshe atap ótken jón. Sportshylarymyzdyń qajyrly eńbegi men úzdiksiz daıyndyqtarynyń arqasynda osyndaı úlken jetistikke qol jetkizip otyrmyz. Frıstaıl-akrobatıkadaǵy jigitterdiń altynynan keıin ile-shala bıatlon sportyndaǵy sańlaqtarymyz el qorjynyna bir altyn, bir kúmis júlde saldy. 10 shaqyrymǵa sprınttik jarysta Vladıslav Kıreev máre syzyǵyn birinshi kesip, mereıimizdi tasytty. Taǵy bir otandasymyz Vadım Kýrales te ekinshi orynǵa ıe bolyp, kúmis júldeger atandy. Sportshylarymyz bul júldemen shektelip qalmaıdy dep senemin. Birer kúnnen soń olar komandalyq synda jarys jolyna shyǵyp, taǵy da joǵary jetistigimen qýantady dep úmittenemiz, – dedi E.Myrzabosynov.
Iаbýlı qalasynyń taý silemderindegi san salaly joldarda saıysqa túsken shańǵyshylarymyzǵa da medal buıyrdy. Áıelder arasyndaǵy estafetalyq tartysta (4h5 km) Kamıla Elǵazınova, Ksenııa Shalygına klassıkalyq ádiste jarys jolyna shyqsa, Angelına Shýryga, Nadejda Stepashkına erkin ádispen jarysty túıindep, kúmis júldege qol jetkizdi. Azııa oıyndarynyń altynyn Qytaı qyzdary aldy, qola júlde Japonııa sportshylaryna buıyrdy.
Erler saıysynda tórt sportshymyz estafetalyq tartysty jaqsy bastaǵan edi. Klassıkalyq ádispen jarys jolyna shyqqan Konstantın Borsov qarsylastarynan oq boıy ozyp keldi. Estafetany qabyl alyp jarysty jalǵaǵan Naıl Bashmakov, kúshin kúni buryn sarqyp aldy ma, márege taıanǵanda jyldamdyǵyn báseńdetip qaldy. Erkin ádispen saıysty jalǵastyrǵan Oljas Klımın kósh bastap kelip tizgindi Vladıslav Kovolıovke ustatty. Biraq Qytaı men Japonııa sportshylary jerlesimizden oq boıy uzap alyp, jetkizbedi. Osylaısha, erler quramasyna estafetalyq saıystyń qola medali buıyrdy.
Ázirge sportshylarymyzdyń enshisinde 3 altyn, 7 kúmis, 5 qola medal bar.
