«ERG» kompanııasy jumys oryndaryna sıfrlyq transformasııa júrgizip, jańa kásipterdi qarqyndy damytyp jatyr. Birinshi kezekte bul qaýipsiz eńbek jaǵdaıyn jasaýǵa kerek. Nátıjesinde, júrgizýshi, uńǵylaýshy men kenshi taý-ken tehnıkasynyń operatoryna aınalady. Top kásiporyndardaǵy 200 úderis pen 50-ge jýyq mamandyq sıfrlandyrylǵan.
Elimizde tuńǵysh ret «Shyǵys» kenishinde júrgizýshisi joq samosvaldar iske qosyldy. Jańa mamandyq – júrgizýshisi joq samosval operatory degen mamandyq paıda boldy. Robottalǵan tehnıka keshenine bar bolǵany 2 adam qyzmet kórsetedi. Júrgizýshi-operator 3 kóliktiń jyldamdyǵy durys bolýyn, qozǵalys traektorııasy men qaýipsizdigin baqylaıdy. Osy mamandardyń kásibı sheberliginiń arqasynda júrgizýshisi joq kólikter búginge deıin 1 mln tonnadan astam taý-ken massasyn tasydy.
Erterekte Darhan Ishanqulov degen maman «ERG» kompanııasyna dánekerleýshi bolyp jumysqa turǵan. Suranys bolǵan soń, 2022 jyly qaıta oqyp, jańa mamandyq – «aýyr júk kóliginiń júrgizýshisi» mamandyǵyn meńgerip aldy. Taıaýda daǵdylaryn odan ári damytyp, qazir júrgizýshi-operator bolyp jumysqa kiristi.
«Biz munymen toqtamaımyz. Kásiporyndarǵa jasandy ıntellektini engizemiz. Ol barlyq úderisti avtomattandyryp, qaýipsizdikti jaqsartyp, shyǵyndy azaıtýǵa septesedi. Mysaly, Dóń taý-ken baıytý kombınatynda shekemtas óndiretin telimdegi bolat taspanyń ahýalyn baqylap, oǵan monıtorıng jasaıtyn mashınalyq baqylaý júıesin ornattyq. Ol taspanyń qyzyp ketýiniń aldyn alyp, aqaýlardy tez tabýǵa kómektesedi», dedi ERG mamany Oljas Mamyrbaev.
«ERG» tek óz mamandaryn ǵana damytýmen shektelmeı, bilim berý júıesin, kadr daıarlaý isin ilgeriletip, álemdik standarttarǵa ilesýge óz úlesin qosyp júr. Osy orynda kompanııanyń jas jumysshy mamandaryn áńgimege tarttyq.
Qadyrjan Jaýlybaıdyń mamandyǵy – elektrmontajshy. Hromtaýdaǵy Dóń taý-ken baıytý kombınatynda jumys isteıdi. Jasy 24-ke aıaq basqan maman qazirdiń ózinde úlken jetistikke jetip, kásibı mamanǵa aınalǵan. Kolledjdi támamdaǵan soń áskerı boryshyn ótep kelip, mamandyǵy boıynsha aıtylǵan kombınatqa qyzmetke turǵan. О́ıtkeni ata-anasy men týǵan-týysynyń kópshiligi sol kásiporynda eńbek etedi. Al ózi qyzmetimen qatar, oqýyn Rýdnyı qalasyndaǵy Indýstrııalyq ınstıtýtta jalǵastyryp jatyr.
«О́tken jyly «ERG»-diń jas mamany retinde Hromtaý qalasynda ótken «ERG Skills» kásibı sheberlik baıqaýyna qatysyp, 1-oryndy jeńip aldym. Sóıtip, Qytaıda eki aptalyq halyqaralyq taǵylymdamadan óttim. Sonda qazaqstandyq jáne qytaılyq stýdentter men qyzmetkerler arasyndaǵy dostyq kásibı sheberlik baıqaýynda baq synadym. Áriptesim Dzıýba Maksımmen birge toptyq saıysta 1-orynǵa ıe bolyp, jeńispen oraldyq», dedi ol.
Kelesi keıipker – Hromtaý kolledjiniń túlegi, búginde kompanııa qyzmetkeri Raıhan Narkenova. Ol dánekerleýshi tek jigitter ǵana meńgeretin mamandyq emes ekenin dáleldedi. Taıaýda Qytaıda ótken halyqaralyq kásibı sheberlik baıqaýynda «Dánekerleý tehnologııasy» qyzmeti boıynsha ol da 1-oryndy jeńip aldy. Sóıtip, Qazaqstan jáne Qytaı mamandary arasynda úzdik boldy.
«Qazir mende 4-razrıad bar, 5-razrıadty alýǵa daıyndalyp júrmin jáne «ERG»-de dánekerleý tehnologııalary salasynda mansabymdy jalǵastyramyn. Buıyrtsa, kompanııa joldamasymen Qaraǵandy ýnıversıtetine oqýǵa baramyn», dedi jas maman.
«ERG» kompanııasy kolledjder alıansyn qurǵan. Top kásiporyndar ornalasqan qalalardaǵy 23 kolledj ben 3 joǵary oqý orny alıans qatarynda. Ondaǵy 10 kolledjde «ERG» qyzmet ortalyǵyn ashqan. Byltyr kolledjderdi jabdyqtaýǵa 600 mln teńgeden astam qarajat baǵyttaǵan. Odan bólek, stýdentter Qytaı men Germanııaǵa taǵylymdamaǵa jiberiledi. О́tken jyly kolledjderdiń 737 túlegi kompanııa ujymnyń qataryna qosylyp, balǵyn jastardy jumysqa alý boıynsha rekordtyq kórsetkishke qol jetkizdi.
