Jaqsy dástúrge aınalǵan bul týrnırge onyń áriptesteri, dostary, dıplomattar men otbasy músheleri jınaldy. Qatysýshylar úshin bul jaı ǵana jarys emes, Qazaqstannyń syrtqy saıasatyn damytýǵa jáne onyń halyqaralyq bedelin nyǵaıtýǵa zor úles qosqan kórnekti tulǵany eske alý múmkindigi.
Bıǵalı Turarbekov óziniń tamasha dıplomatııalyq mansabymen ǵana emes, sonymen qatar sportqa degen súıispenshiligimen de tanymal boldy. Ol voleıbol jáne ústel tennısimen kásibı túrde aınalysqanymen, bılıard oıynyn erekshe unatatyn.
Onyń ómiri – Otanǵa qyzmet etýdiń, óz ustanymdaryna degen adaldyqtyń jarqyn úlgisi. Ol sonaý 1991 jyly dúnıejúzindegi qazaqstandyqtardyń quqyqtaryn qorǵaýdy qamtamasyz etip, táýelsiz Qazaqstannyń konsýldyq qyzmetiniń negizin qalady. Onyń jetekshiligimen ázirlengen qujattar Qazaqstan Respýblıkasy Syrtqy ister mınıstrliginiń konsýldyq qyzmetinde áli de qoldanylyp keledi.
Bıǵalı Sháripqalıulynyń Beıjińdegi jumysy, sonyń ishinde Qazaqstan elshiliginiń ashylýy Qytaımen senim kópirlerin nyǵaıtty. Sonymen qatar QHR-daǵy etnıkalyq qazaqtarmen tyǵyz baılanys ornatyp, olardyń tarıhı otanymen baılanysyn saqtaýǵa kómektesti.
Bıǵalı Sháripqalıuly Qazaqstannyń memlekettik shekarasyn delımıtasııalaý jáne demarkasııalaý máseleleri boıynsha kelissózderdegi negizgi tulǵalardyń biri boldy. Kórshiles eldermen kelissózder júrgizýde úkimettik delegasııalardy basqaryp, ulttyq múddeni tabandylyqpen qorǵady.
Osyndaı orasan eńbegine oraı «Eren eńbegi úshin» medalimen marapattalǵan. Onyń Shanhaı yntymaqtastyq uıymyndaǵy qyzmeti Qazaqstannyń álemdik arenadaǵy múddesine adal qyzmetiniń jalǵasy edi.
Ol «Qazaqstan Respýblıkasynyń memlekettik shekarasy týraly aqıqat» kitabynyń avtorlarynyń biri bolyp esepteledi. Bul kitap zamanaýı dıplomatııa, kelissózder jáne egemendi memlekettiń qalyptasýy týraly oqýlyq retinde búginde keńinen qoldanylady.
«Meniń ákem bılıardty jaqsy kóretin», - dep eske alady dıplomattyń qyzy Janet Turarbekova. - Qatarynan 15-shi ret ótkizilip otyrǵan bul týrnır ony eske alýǵa, onyń ómirge qushtarlyǵy men týǵan jerge súıispenshiligin, dostyqtyń qadirin biler qasıetin qurmetteýdiń tamasha tásili. Biz úshin bul jaı ǵana jarys emes, ákemizdiń estelikterin jáne ony biletin, baǵalaıtyn adamdarmen baılanysty saqtaý múmkindigi. Bılıard týrnıri onyń murasyn saqtaýdyń mańyzdy bóligine aınaldy jáne bul dástúr jalǵasyn tabady dep úmittenemiz. Sebebi, Bıǵalı Sháripqalıuly Turarbekov syndy birtýar qazaqstandyqtardyń eńbegi týraly jastar habardar bolýy kerek».
Bıylǵy jyly týrnırge 30-dan astam adam qatysty, olardyń arasynda kórshiles memleketterdiń konsýldary, Qazaqstan Respýblıkasy Syrtqy ister mınıstrliginiń qyzmetkerleri, sondaı-aq dıplomatııalyq qyzmettiń ardagerleri jáne basqa da uıymdardyń qyzmetkerleri boldy. Bul dodada H. Nıshanbaev myrza jeńimpaz atansa, ekinshi oryndy S. Orýmbaev, úshinshi oryndy V.Týrdıev myrzalar bólisti.
Saıys jaıly jáne jaǵymdy atmosferada ótti. Qatysýshylar Bıǵalı Sháripqalıulyn eske ala otyryp, onyń jarqyn minezin, kásibı sheberligin, adamı qasıetterin pash etetin áńgimelerimen bólisti. Bıǵalı Turarbekov kemeńger dıplomat qana emes, ómirge qushtar, dostyqtyń qadirine jeter adal dos bola bilgen azamat. Dıplomattyń bılıardqa degen súıispenshiligi onyń erekshe tulǵasynyń sımvolyna aınaldy. Ony eske alýǵa arnalǵan jyl saıynǵy týrnır – sport janashyryn baǵalaıtyn jandardyń basyn qosatyn tamasha dástúrge aınaldy.
