«Aldaǵy kóktemgi egis, kúzgi jıyn-terim naýqanyna el kóleminde 700 mlrd teńge jeńildetilgen nesıe qarjysy bólindi. Prezıdent taıaýda neǵurlym ótimdi, naryqta joǵary suranysqa ıe daqyldardy ósirý, shıkizatty saqtaý jáne ony tereńdete óńdeý, sondaı-aq ónimdi sheteldik naryqqa kóbirek ótkizýdi retteýdi taǵy da atap ótti. Memlekettik qoldaý kólemi jyl saıyn ósip keledi. Bıyl Prezıdenttiń tikeleı tapsyrmasymen aýyl sharýashylyǵyn qarjylandyrý kólemi respýblıka boıynsha eki ese artady. Osy múmkindikti tıimdi paıdalana bilýimiz kerek», dedi oblys ákimi Qumar Aqsaqalov Aýyl sharýashylyǵy basqarmasynyń alqa májilisinde.
Aýyl sharýashylyǵy jáne jer qatynastary basqarmasynyń basshysy Ibragım Bekmuhamedovtiń aıtýynsha, bıyl kóktemgi dala jumystaryn júrgizýge 80,9 myń tonna, kúzgi jıyn-terim jumystaryna 83,3 myń tonna dızel otyny bólindi. Taıaýda Gosagro.kz aqparattyq júıesinde janarmaı jetkizýshi operatorlardyń tizimi jarııalanady. Fermerler dızel otynyn jetkizýshini ózderi tańdap, ótinim bere alady.
«Aýyl sharýashylyǵy qurylymdarynyń aldynda turǵan mańyzdy mindettiń biri – egis alqaptaryn ártaraptandyrý, monodaqyldan alshaqtaý. Sharýashylyqtar osy máselege basa kóńil bólýi kerek. Sondaı-aq keıingi kezde kartop tapshylyǵyn sezinip jatyrmyz. Sondyqtan kartop alqabyn ulǵaıta túsken jón. О́ńir dıqandarynyń aldynda júgeri jáne qaraqumyq alqabyn keńeıtý mindeti tur. Osy máselege de muqııat qaraýdy suraımyz. Qostanaı óńiri mıneraldy tyńaıtqyshtardy paıdalanýdan aldyńǵy qatarda keledi. Byltyr alqapqa 258,6 myń tonna tyńaıtqysh shashý kózdelgen edi, bul jospar da tolyq oryndaldy. Tehnıka parkin jańartý ındıkatory da oıdaǵydaı atqaryldy», dedi Aýyl sharýashylyǵy vıse-mınıstri Azat Sultanov.
Bıyl óńirde 755 myń gektar alqapty maıly daqyl alady. Mal azyǵynyń kólemi 137,5 myń gektarǵa deıin ulǵaıady. Aýyl sharýashylyǵy kásiporyndary 21 myń gektarǵa qaraqumyq, 6,1 myń gektarǵa kartop tuqymyn egýdi josparlap otyr.
Keńes barysynda memlekettik qoldaý tetikterin ýaqytynda ári tıimdi paıdalana bilý máselesi de talqylandy. Mysaly, ótken jyly iske qosylǵan «Keń dala-2» baǵdarlamasy sharýalarǵa 5 paıyz jyldyq ósimmen jeńildetilgen nesıe alýǵa múmkindik beredi. Nesıe merzimi – 12 aıǵa deıin. Nesıe alatyn kepildigi joq fermerler «Damý» kásipkerlikti damytý qorynan nesıe somasynyń 85 paıyzyn quraıtyn kepildik ala alady.
«Osylaısha, aýyl sharýashylyǵy ónimin óndirýshige kepildiktiń 15 paıyzyn qoıý ǵana qalady. Basty maqsat – atalǵan qoldaý túrin tıimdi paıdalana otyryp, ónim kólemin arttyrýdy qamtamasyz etý. О́nimniń arzandap ketkenine qaramastan, óńirde jaqsy tabysqa jetip jatqan sharýashylyqtar az emes. Bul sharýashylyqtar egin alqaptaryn áldeqashan ártaraptandyrdy. Mal sharýashylyǵymen de aınalysyp jatyr. Aýyl sharýashylyǵy qurylymdaryna memleket qomaqty qarjylaı qoldaý kórsetip jatyr», dedi oblys ákimi.
Qostanaı oblysy
