Jambyl oblysy ákimdiginiń baspasóz qyzmeti keltirgen derekke júginsek, jambyldyq delegasııa músheleri túrkııalyq áriptesterine óńirdiń ınvestısııalyq múmkindikterin tanystyrǵan. Mersındik isker toptarmen toptarymen tájirıbe almasý, óndiristik kooperasııa jáne ınvestısııalyq yntymaqtastyq, jetekshi ónerkásiptik kompanııalarmen seriktestik baılanys ornatý máselesi boıynsha kelissózder júrgizgen.
Jambyldyq delegattarmen birge júrgen elimizdiń Túrkııadaǵy tótenshe jáne ókiletti elshisi Erkebulan Sápıev, Bas konsýl Qýat Qanafeev, Mersın shaharyndaǵy qurmetti konsýl Ahmet Býdan birqatar ındýstrııalyq-ónerkásiptik aımaqty aralap, baýyrlas eldiń ekonomıkalyq áleýetimen tanysty.
Oblys basshysy bastaǵan top Akkýıý atom elektr stansasyna irgeles jatqan aýdandardyń ekonomıkalyq damý dınamıkasyna aıryqsha nazar aýdardy. Mersındikterdiń aıtýynsha, atqarylǵan jumystar Gıýlnar jáne Sılıfke aýdandarynyń ekonomıkasyn 40 paıyzǵa eselegen.
Issapar barysynda atom elektr stansasy qurylysynyń mýltıplıkatıvti áseri týraly da egjeı-tegjeı áńgime aıtyldy. Derekke sensek, AES qurylysy alańynyń janyndaǵy jumysshylarǵa arnalǵan turǵyn úı keshenine bar. Munda barlyǵy 3200 adamǵa arnalǵan 24 jataqhana salynǵan.
Erbol Qarashókeev Medcem Cement Group basshylyǵymen qurylysty damytýdy yntalandyrý jáne qurylys ındýstrııasyna álemdik standarttardy engizý boıynsha belsendi sharalardy talqylady. Medcem Cement zaýyty – jyldyq qýaty 6,6 mln tonna ónim shyǵaratyn álemdegi eń iri sement zaýyttarynyń biri.
Jambyl oblysynyń kásipkerleri túrkııalyq áriptesterine óńirdiń baı mıneraldyq-shıkizat resýrstary týraly aıtyp, tájirıbelerimen bólisip, odan ári yntymaqtastyqtyń negizgi baǵyttaryn usyndy.
Delegasııa músheleri atom elektr stansııasynyń bolashaq jumysshylary úshin salynyp jatqan úlken turǵyn úı kesheniniń qurylysyn mysalǵa ala otyryp, Mersındegi qurylys ındýstrııasynyń áleýeti týraly tereńirek bildi. Ár túrli kólemdegi páterlerden bólek, nysan aýmaǵynda balabaqshalar, mektepter, bıznes, densaýlyq saqtaý, sport nysandary, oıyn alańdary, qonaq úı, mádenıet ortalyǵy salynady, kólikterge arnalǵan elektr zarıadtaý stansııalary, shatyrlarda elektr qýatyn óndiretin kún batareıalary bolady.
Jambyl oblysynyń ákimi turǵyn úı qurylysy boıynsha túrkııalyq taraptyń tájirıbesin zerdelep, jaýapty azamattarǵa jańa tehnologııalardy engizýdi tapsyrdy. Mersınniń ındýstrııalyq-ónerkásiptik aımaǵyna sapar barysynda óndiris oryndarymen tanysyp, birlesken kásiporyndar qurý máselesin talqylady. Atap aıtqanda, delegasııa Yılbor Boru plastık qubyrlar zaýytyn, Gökmak bolat konstrýksııasy men jeldetý júıesi zaýytyn, sondaı-aq Berdan Çevata bekitkish óndirý zaýytyn aralady.
Arbel Group dándi jáne burshaq daqyldaryn qaıta óńdeý zaýytynda aýyl sharýashylyǵy ónimderin óndirý jáne qaıta óńdeý jónindegi jobalardy birlesip iske asyrý jónindegi josparlar zerdelendi.
Ulusu Pompa sorǵy jabdyqtarynyń keń aýqymyn óndirýge mamandanǵan kompanııa. Bul baǵyt jer asty sýlaryn tıimdi paıdalaný jáne uńǵymalardy burǵylaý boıynsha aýqymdy jumystardy eskere otyryp, Jambyl oblysy úshin ózekti bolyp otyr. Asya sera kompanııasy jylyjaı qurylysyna arnalǵan berik konstrýksııalar shyǵarý jobalaryn usyndy.
Oblys ákimi kompanııalardy Jambyl oblysynda joǵary tehnologııalyq óndiris oryndaryn ashýǵa shaqyryp, kásipkerlikti qoldaý sharalary, onyń ishinde jańa kásiporyndar úshin daıyn óndiristik alańdar berý týraly aıtty.
Eki jaqty kezdesý barysynda Erbol Qarashókeev pen Mersın provınsııasynyń gýbernatory Atılla Toros túrli salalardaǵy strategııalyq áriptestikti odan ári nyǵaıtý jáne keńeıtý áleýetterin talqylady. Jambyl oblysynyń Moıynqum, Shý aýdandary men Mersın provınsııasynyń Gıýlnar jáne Sılıfke aýdandary arasyndaǵy saýda-ekonomıkalyq baılanysty nyǵaıtý týraly kelisimderge qol jetkizildi.
Jambyl oblysy
