Kitap kórmesiniń «Aqqan juldyz» atty birinshi bóliminde Shoqannyń ómiri men qyzmeti týraly ensıklopedııalar, bıblıografııalyq anyqtamalar men ádebıetter qoıylǵan. Al «Shoqan jáne dala órkenıeti» atty ekinshi bólimde ǵalymnyń jazbalary, 10 tomdyq shyǵarmalar jınaǵy, «Altyshaharǵa sapar», «Shoqan asýlary» atty kitaptar oqyrmandar nazaryna usynylǵan.
Saltanatty rásimde oblystyq tarıhı-ólketaný mýzeıiniń qyzmetkerleri kópshilikti ózderimen birge ala kelgen kóshpeli kórmeniń mazmunymen tanystyrdy. Mýzeıdiń ǵylymı hatshysy Názıma Otashevanyń aıtýynsha, ólketaný murajaıynda Shoqannyń ómiri men qyzmetine qatysty fotosýretter men qujattardyń 60-qa jýyq kóshirmesi saqtalǵan. Olardyń kóbi 1960, 1970, 1980 jyldary qazirgi Sankt-Peterbýrgtiń ortalyq memlekettik arhıvi men Máskeý qalasyndaǵy áskerı-tarıh arhıvinen alynǵan.
Mysaly, atalǵan kórmeden Azııa departamentiniń Syrtqy ister mınıstrligine Sh.Ýálıhanovty Azııa departamentine qabyldaý týraly ótinishin, 1860 jyly 21 naýryzdaǵy Bas shtab departamentiniń Sh.Ýálıhanovty marapattaý týraly qujat kóshirmesin kórýge bolady. Shtabs-rotmıstr Ýálıhanovtyń qyzmeti týraly formýlıarlyq tizim de bar.
Shoqan 1858 jyly 28 maýsymda Qapaldan 30 shaqyrym jerden kópes kerýenimen Qashqarǵa saıahattap baryp, Shyǵys Túrkistan tarıhyna, geografııasyna, Altyshaharǵa qatysty kóptegen qundy málimet jınaıdy. Atalǵan kórme Shoqannyń osy sapary jóninde de jan-jaqty maǵlumat beredi.
Ǵalym Shoqannyń jastaıynan sýret ónerine áýes bolǵany belgili. Bala Shoqan bul ónerdi Qusmuryn bekinisinde, Ýálıhanovtar otbasynda biraz ýaqyt ómir súrgen orys topograf-sýretshileri men geodezısterinen úırenedi. Kóshpeli kórmeden Shoqannyń osy kezeńde salǵan biraz sýretin tamashalaýǵa bolady.
«Shoqan alǵash týsh, qaryndash, keıinirek akvareldi qoldanǵan. Tabıǵat sýretterin, óziniń avtoportretin salǵan. Keıinnen kózben kórgenderin kúndeligine túsirip, beınelep otyrady. Ǵalym muralarynyń ishinde onyń qaryndashpen, sııamen syzǵan eskızderi mańyzdy oryn alady. Munda kóptegen jerdiń florasy men faýnasy, Qyrǵyzstan men Shyǵys Túrkistan turǵyndarynyń keskin-kelbeti jáne olardyń kásipteri beınelengen», deıdi Názıma Otasheva.
Qostanaı oblysy
