Batyrdyń nemere týysy 87 jastaǵy Zulqarnaı Bashbaevtyń aıtýynsha, Imanǵalı Taýqyshuly ata-anasynan 12 jasynda jetim qalyp, ákesiniń nemere aǵasynyń áıeli Zeriptiń qolynda tárbıelenipti. Taýqyshtyń birge týǵandary 1930-shy jyldardyń ashtyǵynda qaıtys bolǵan. Qurashasaı aýylynda bastaýysh mektepti bitirip, ári qaraı oqýyn aýdan ortalyǵy Qobdada jalǵastyrǵysy kelgenimen, qatynaýy qıyn bolǵan soń oqýyn jalǵastyra almaıdy. 16 jasynda mehanızatorlar kýrsyn bitirip, keńshar traktoryn júrgizgen. 1943 jyldyń 2 qańtarynda áskerge shaqyrtylyp, pýlemetshi retinde 1 –Ýkraın maıdany 289 – atqyshtar polki, 120 – atqyshtar dıvızııasynyń quramynda Kıev, Harkov, Dnepropetrovsk qalalaryn azat etip, Dnepr ózeni úshin shaıqasty. 1945 jyly 26 aqpanda Polshadaǵy Opole qalasynyń mańynda 19 jasynda qaza tapty.
1945 jyldyń 16-25 qańtarynda Oderfeld derevnıasy mańynda keńes áskeriniń negizgi kúshterin Oder ózeninen ótkizýdegi plasdarm qorǵanysynda Imanǵalı 120 jaý sarbazynyń kózin joıǵan. 25 qańtarda bir kúngi urysta 58 nemis soldaty men ofıserin óltirgen. Sol kúni oq jaryqshaǵy tıgenine qaramastan, shaıqasty jalǵastyra bergen. Osy erligi úshin Keńester Odaǵynyń batyry ataǵyna usynylǵanyn aıtyp, 289-atqyshtar polkiniń komandıri aýyldaǵy Zerip sheshesi men inisi Ysqaqqa hat jazady.
26 aqpanda dzotqa qaraı shegingen nemis soldattarynyń atqan avtomat oǵy Imanǵalıǵa tıip, aýyr jaralansa da, aqyrǵy kúshin jınap beline baılanǵan granatalardy jaý dzotyna laqtyryp erlikpen qaza tapty. Batyr Polshadaǵy Bolevlavıse derevnıasyndaǵy áskerı zıratta jerlengen. Bul jerde keńes Armııasynyń 141 sarbazy jatyr.
1997 jyly Imanǵalı Biltabanovtyń esimi Qobda aýdanyndaǵy aýyldyq okrýgke berildi. Osy jerdegi aýyl mektebi de batyrdyń esimin ıelengen. Qobda aýdandyq mýzeıiniń meńgerýshisi Gúlbarshyn Erǵalıevanyń aıtýynsha, Imanǵalıdan úıine eki hat kelgen. Birinshisi, 1944 jyldyń 12 tamyzynda inisi Ysqaqqa jazǵan haty. Araılym Shoımanova tapsyrǵan osy hattyń túpnusqasy Qobda aýdandyq mýzeıiniń ekspozısııasynda tur. Al, 1945 jyldyń qańtarynda jiberilgen haty joǵalyp ketken.
Ekinshi dúnıejúzilik soǵys jyldary Aqtóbe oblysynan 38 Keńester Odaǵynyń batyry, 9 «Dańq» ordeniniń ıegeri shyqsa, onyń 8-i Qobda topyraǵynan maıdanǵa attanǵandar. Qobda aýdandyq ardagerler keńesiniń tóraǵasy Nurlybek Kereımaǵambetovtyń aıtýynsha, bulardan ózge atalmaı qalǵan eki batyr bar. Onyń biri, maıdannan oralǵan boıy Almatyǵa kóship ketken Joldybaev bolsa, ekinshisi Dnepr ózenindegi shaıqastaǵy erligi úshin Keńester Odaǵynyń batyry ataǵyna usynylǵan Raqyshev degen jigit.
«Alaıda Raqyshevke Keńester Odaǵynyń Batyry ataǵyn berý týraly usynys hattyń birinde ony Dnepr ózeniniń sol jaǵalaýynda erlik kórsetti dep, ekinshisinde oń jaǵalaýy dep jazylǵan. Sáıkessizdikti túzetýge ýaqyt beriledi. Osy aralyqta ol nemisterdiń tutqynyna túsip qalady», dedi N. Kereımaǵambetov.
