Alypty baǵyndyrǵan arýdyń kenishke jumysqa kelýi de kezdeısoq. «Rýdnyı sý qubyry» seriktestiginde sýsorǵysh qurylǵynyń mashınısi bolyp jumys istep júrgen kezinde Lıýbov qoly bos kezde taksı qyzmetine shyǵyp, qosymsha tabys taýyp júredi. Osyndaı sáttiń birinde kóligine otyrǵan jolaýshynyń biri Qashardaǵy avtokólik seriktestiginiń bastyǵy Maqsat Qalambaev bolyp shyǵady.
«Kólik júrgizý mánerim kóńilinen shyqsa kerek, Maqsat Nurǵalıuly kenishte júrgizýshi jetpeı jatqanyn aıtyp, jumysqa shaqyrdy. Bir aptadan keıin baryp, ótinish jazyp, jumysqa kirdim. Bir jyl «Nıva Shevrolet» avtokóligimen markshreıder, gıdrotehnık mamandardy karerge tasydym. Kenish túbinde júrgen alyp tehnıkalarǵa osy kezden bastap qyzyǵa bastadym. Taý kóship kele jatqandaı bolyp kórinetin alyp tehnıkanyń qasynda meniń «Nıvam» shyrpynyń qorabyndaı ǵana bolyp qalady. Ekinshi jyly «KamAZ-33081» kóligine aýystym. Odan keıin Rýdnyı korporatıvtik ýnıversıtetinde «Hitachi EH-3500», «Hitachi EH-4000» aýyr júk tasymaldaǵyshtaryn basqarýdy úırendim», deıdi Lıýbov.
Teorııalyq bilim alyp, arnaıy trenajerdegi tájirıbeden keıin nusqaýshy mamannyń baqylaýymen eki jarym aı taǵylymdamadan ótken qaısar kelinshek kópten kózdegen maqsatyna jetip, sý jańa «Hitachi EN 4000» aýyr tehnıkasynyń tizginine otyrady.
«Karer kóligin júrgizý úshin, eń bastysy, tehnıkanyń kólemin eskerip, burylystarda, tar ótkelderde abaı bolý qajet. Kólik óte úlken. Áý basta qıyn bolǵanymen, qazir úırenip aldym. Jerasty jynysy ár túrli bolady. Rýdany qoımaǵa, jartas pen topyraqty arnaıy úıindige aparyp tógemiz. Aınalanyń bárin kabınada turǵan monıtor arqyly anyq kórip otyramyz. Monıtor qaıda baratynymyzdy, qaı ekskavatordyń janyna baryp toqtaıtynymyzdy da kórsetip turady. Kólikte elektrdınamıkalyq tejeý júıesi, krýızdik baqylaý qondyrǵysy bar. Qaýipsizdik erejelerin saqtaı bilseń bolǵany. Er adamdarmen birge jumys isteseń, ózińe óziń senimdi bola túsesiń. Taıaýda qatarymyzǵa Radmıla esimdi taǵy bir áıel kelip qosyldy», deıdi karer kóliginiń júrgizýshisi.
Karer júrgizýshisi jumystan tys ýaqytyn úı sharýasyna, eki balasyna arnaıdy. Uly Álisher de, qyzy Ánel de – oqý ozaty. Lıýbovtyń ózi de taıaýda kásipodaq uıymynyń «Eńbek ozaty» tósbelgisimen marapattaldy.
«Álisher 13 jasta. Úıdiń janyndaǵy mektepte oqıdy. О́tkende ǵana ulymnyń úı tapsyrmasyna kómektesip otyryp, ekeýimiz «Ozattar otbasy» degen taqyrypta esse jazdyq. Balalarym meni, men balalarymdy maqtan tutamyn», deıdi Lıýbov Babasheva.
Qostanaı oblysy
