Foto: accountingweb.com
Aıdarbek Hodjanazarov bul shaǵymdardy elektr energııasy tarıfteriniń qymbattaýy, ındýstrııalyq aımaqtar men ınfraqurylymnyń jetkiliksizdigi, otandyq óndirýshilerdiń memlekettik satyp alýlarǵa qoljetimdiliginiń tómendigi, ákimshilik kedergiler men tekserýlerdiń kóbeıýi, jedel medısınalyq jekemenshik qyzmetterdiń quqyqtyq rettelýi syndy 5 taqyryp aıasyna toptastyrǵan.
Depýtattyń aıtýynsha, atalǵan máseleler elimizdiń ekonomıkalyq damýyna keri áserin tıgizip, jańa óndirister men jumys oryndaryn ashýǵa tosqaýyl bolyp otyr.
Ol depýtattyq saýalynda máseleni sheshýdiń 5 jolyn qosa usyndy.
-Keıbir óńirlerde elektr energııasynyń tarıfi keıingi eki jylda 50-60%-ǵa ósken. Aqtóbe oblysynda tarıf 52 tg/kVt, Túrkistan men Shymkentte 48 tg/kVt jetken. Bul óz kezeginde kásipkerlerdiń isine keri áserin tıgizbeı qoımaıdy, - degen Aıdarbek Hodjanazarov tarıf belgileý júıesine qoǵamdyq baqylaý engizip, elektr energııasynyń sońǵy baǵasyna qandaı deldaldar áser etetinin ashyq jarııalaýdy usyndy.
Sondaı-aq, elektr energııasynyń kóterme jáne bólshek naryǵyndaǵy monopolııaǵa qarsy tekserý júrgizip, kásipkerler úshin ıkemdi tarıftik saıasat ázirleý, tutyný kólemine qaraı jeńildikter qarastyrý bastamasyn kóterdi.
«Respublica» partııasynyń tóraǵasy ındýstrııalyq aımaqtar men ınfraqurylymdy damytý, memlekettik satyp alýlardaǵy ádiletsiz básekege qatysty da ózekti máselelerdi ortaǵa saldy.
2023 jyly Qazaqstanda 12 000 bıznesti zańsyz tekserý deregi tirkelgen. Almatyda tekserýlerdiń 40%-y sotta zańsyz dep tanylǵany belgili boldy.
«Kásipkerler tekserýshi organdar tarapynan ádiletsiz qysymǵa ushyrap otyr. Sondyqtan árbir memlekettik organda bıznes ombýdsmenin engizip, barlyq tekserýler «Bir tereze» qaǵıdasy boıynsha júrgizilip, kásipkerler jylyna tek bir ret esep berýi tıis.Tekserýlerdi onlaın tirkeý jáne kásipkerlerge zańsyz tekserý júrgizgen sheneýnikterdi jaýapkershilikke tartý qajet», dedi Aıdarbek Hodjanazarov.
