Sýret: olympic.kz
Elimiz quramasynyń bas bapkeri Petr Gamıdov Abzal Ájiǵalıev, Denıs Nıkısha, Ádil Galıahmetov, Mersaıd Jaqsybaev, Gleb Ivchenko, Iаna Han, Zeınep Qumarqan, Olga Tıhonova, Málıka Ermek, Alına Ájiǵalıevaǵa senim artyp otyr. Short-trekshilerimizdiń deni – halyqaralyq arenalarda atoı salyp júrgen tájirıbeli sportshylar. Aldy álem chempıonatynda júlde alyp, Olımpııa oıyndarynda óner kórsetse, ózgeleri álem kýboginiń kezeńdik saıystarynda jeńis tuǵyryna kóterildi. Sondyqtan aıtýly alamanda qazaq jankúıerleri medaldyń syńǵyryn estıdi dep úmittenemiz.
Short-trekten álem chempıonaty 1976 jyldan beri uıymdastyrylyp keledi. Jarysta Azııa qurlyǵynyń ókilderi mol oljaǵa keneldi. Máselen, Ońtústik Koreıa 265 (113 altyn+83 kúmis+69 qola) júldeni qorjynǵa salsa, Qytaı 160 (69+48+43) medal ıelendi. Úzdik úshtikti Kanada túıindep tur. Úıeńki japyraqtary eliniń sportshylary 222 (62+85+75) ret jeńis tuǵyryna kóterildi. Sondaı-aq TOP-10-dyqqa Nıderland (27+20+18), AQSh (17+18+33), Japonııa (13+19+23), Ulybrıtanııa (7+10+9), Majarstan (8+9+4), Italııa (6+18+28), Reseı (3+6+9) enip otyr.
Elimiz óz tarıhynda bir júlde ǵana oljalady. Onyń ıegeri – Denıs Nıkısha. Byltyr Nıderlandtyń Rotterdam qalasynda ótken álem chempıonatynda 29 jastaǵy Aqmola oblysynyń ókili 500 metrlik saıysta kúmis medaldy moınynda jarqyratty. Ol tek Phenchhan Olımpıadasynyń jeńimpazy ári qola júldegeri, álemniń 9 dúrkin chempıony, ońtústikkoreıalyq Lın Sıaoszıýnnen qalyp qoıdy. Bul qashyqtyqta Beıjiń Olımpıadasynyń jeńimpazy, fransııalyq Jordan Per-Jıl qolany qanaǵat tutty.
Byltyrǵy dúnıejúzilik dodada Qytaı-dyń qarqynyna eshkim shydamady. Olar tórt altyn alyp, jalpy esepte jeke-dara kósh bastady. Odan keıingi satylarǵa Kanada (2+0+2), AQSh (1+2+3), Ońtústik Koreıa men Nıderland (1+2+0), Italııa (0+2+2), Qazaqstan (0+1+0), Aýstralııa, Polsha (0+0+1) jaıǵasty.
