Sarysý aýdanynda ornalasqan taý-ken óńdeý kombınatyndaǵy tynymsyz tirshilik ilki sátke de toqtaǵan emes. Seksen jylǵa jýyq tarıhy bar óndiris oshaǵynda fosfor shıkizaty úzdiksiz óndirilip jatyr. 900-ge jýyq azamatty jumyspen qamtyp otyrǵan kásiporynda óndiriletin usaqtalǵan fosforǵa degen suranys qaı kezde de joǵary. Kombınat basshylyǵy jumysshylarǵa qoldan kelgenshe qolaıly jaǵdaı qarastyrady.
«Qart Qarataýdyń qoınaýynan fosforıt keniniń óndirile bastaǵanyna 80 jylǵa jýyq ýaqyt ótti. Tarıh úshin 80 jyl degenimiz az ýaqyt shyǵar. Al bizdiń óńirdegi óndiris oshaǵy úshin bul uzaq merzim sanalady. Taý-ken óńdeý kombınatynda qazir 859 adam jumyspen qamtylǵan. Ortasha jalaqy – shamamen 417 myń teńge. Odan bólek, áleýmettik kómekter kórsetiledi», deıdi Sarysý aýdandyq О́nerkásip jáne kásipkerlik bóliminiń basshysy Danııar Ermekbaev.
Bólim basshysy keltirgen derekke súıensek, 2023 jyldyń basynan bastap, «Kóksý» kenishi qyzmetkerlerine jolaqy retinde 21 000 teńgeden berilse, seh qyzmetkerlerine aı saıyn 10 500 teńge tólenedi eken. Al 2023 jyldyń sáýir aıynan beri karerde eńbek etetin azamattarǵa aı saıyn 15 000 teńge qarastyrylsa, avtokólik sehynyń karer mańynda jumys isteıtin eńbekkerlerge 7 500 teńge qarjy bólinipti.
«Ujymda jumysshylardyń densaýlyǵyn jaqsartý máselesi ár kez nazarda. Olardyń ýaqtyly em-dom alýy úshin «Kóktal» emdeý-saýyqtyrý kesheni jumys istep tur. Zeınetke shyqqan ardagerlerge «Kóktal» emdeý-saýyqtyrý keshenine berrettik tegin joldama beriledi. Bir sózben aıtqanda, taý-ken óńdeý kombınatynyń basshylyǵy qyzmetkerlerge qoldan kelgenshe qoldaý kórsetip otyr», deıdi D.Ermekbaev.
Qolda bar málimetke súıensek, kásiporyn basshylary jyl saıyn hımııa qyzmetkerleri kúni jáne shahterler kúni merekesinde jumysshylarǵa qarjylaı syıaqy úlestirse, nátıjeli jumysymen kózge túsken ozat qyzmetkerlerge tońazytqysh, teledıdar, noýtbýk sekildi ózge de baǵaly syılyqtar tabystap, olardyń jumysyna laıyqty qurmet kórsetedi. Sondaı-aq munda túrli merekede sporttyq jáne mádenı is-sharalar turaqty uıymdastyrylady.
«80 jylǵa jýyq tarıhy bar kásiporyn jumysy jyl ótken saıyn qarqyn ala tústi. Máselen, ótken jyly fosfordyń «FKT – 11» markasynyń 839 452 tonnasy óndirilse, «FKT – 9» markaly fosfordyń 199 861 tonnasy, al «FKT – 5» markaly fosfordyń 84 987 tonnasy óndirildi. Jalpy alǵanda, óndirilgen ónim kólemi (usaqtalǵan fosfor shıkizaty) 1 124 300 tonnany qurady. Bul baǵyttaǵy júıeli jumys bir sátke de toqtamaıdy», deıdi D.Ermekbaev.
Kásiporyn basshylyǵy 2022 jyldyń tamyzynan bastap óndiriste eńbek etetin qyzmetkerlerdiń barlyǵyn turaqty túrde túski aspen qamtýdy qolǵa alypty. Budan bólek, áleýmettik seriktestik negizinde aýdanǵa qarasty eldi mekenderge qajet kezde tehnıka berip, kómek kórsetip júr.
«2023 jylǵy jeltoqsanda jarý jumysyna arnalǵan jarylǵysh emes zattardy daıyndaıtyn poremıt zaýyty qaıtadan seh retinde iske qosyldy. Kúrdeli jóndeýden keıin jumysy qaıta jandanǵan sehta qazir 15 azamat turaqty jumyspen qamtylǵan. Poremıt sehynyń kómegimen keshen kareriniń taý-ken jynystaryn jarý jumysy júıeli túrde júzege asyrylyp jatyr», deıdi jaýapty bólim basshysy.
Bizde bar derekke súıensek, ótken jyly kásiporyndaǵy qyzmetkerlerdiń jalaqysy 10%-ǵa kóterilipti. Al 2024 jyly 831,308 tonna taý massasy óndirilgen. Osy jyly kásiporyn jetekshileri kórsetkishti 1 100 000 tonnaǵa deıin jetkizýdi josparlap otyr. Jyl bastalǵaly beri usaqtalǵan fosfor shıkizatynyń úsh markasy boıynsha 167 278 tonna ónim óndirilgenin de aıta ketken jón.
Jambyl oblysy,
Sarysý aýdany
