Foto: sknews.kz
Memleket basshysynyń aıtýynsha, atalǵan óńir barlyq mektep qurylysyn alǵashqy bolyp aıaqtap, 12 myńnan astam oqýshyǵa arnalǵan jańa bilim oshaqtaryn ashty. Alaıda, basqa oblystarda qurylys jumystarynyń baıaý júrýine kóńili tolmaǵan Prezıdent Úkimet pen «Samuryq-Qazyna» qoryna bul jumysty jedeldetýdi tapsyrdy.
«Basqa oblystarda qurylys barysy máz emes. Úkimet pen «Samuryq-Qazyna» qory bul jumysty qolǵa alýy kerek. Men taıaý arada tekseremin», dedi Qasym-Jomart Toqaev.
Sonymen qatar, Prezıdent bıyl elimizde 500 myń oqýshyǵa arnalǵan eki júzden astam mektep salynatynyn málimdedi.
«Myna jaıtty qaperde ustaǵan jón: barlyq jerde tek «Jaıly mektep» jobasy aıasynda mektep salý mindetti emes. Sapaly salynǵan qarapaıym mektepterge de suranys joǵary. Úsh jylda 1300, sonyń ishinde aýyldaǵy 900 bilim ordasyn jańǵyrtý qajet. Jańa oqý jylyna deıin memlekettik jáne jekemenshik mekteptiń barlyǵy balalardyń qaýipsizdigin qamtamasyz etetin arnaıy quraldarmen jabdyqtalýǵa tıis», dedi Memleket basshysy.
