Qaraǵandynyń ózinde 4 mádenıet úıi men 3 jasóspirimder saraıy bar. Bularda júzden asa seksııa jumys isteıdi. Ondaǵy úıirmeler sapaly, zamanaýı quraldarmen jabdyqtalǵan, mamandary bilikti. Olaı bolsa qalalyqtar úshin onsyz da jumys istep turǵan úıirmelerdi nege «Artsport»-tan alyp tastamasqa?
Mádenıet úıi men Oqýshylar saraıynda úıirmege kelgen bir balaǵa 500 teńge (shamamen) qarastyrylǵan, oqytýshylardyń jalaqysy – 80-120 myń teńge aralyǵynda. Al «Artsport»-ta bir balaǵa 28 myń teńge bólinedi. Bir degende 200-400 balaǵa «Artsport» arqyly qyzmet kórsetetin jekemenshik ortalyqtar bar. Olar jylda ártúrli oryn jaldaıdy, mekenjaıy aýysady, jabdyǵy men oqytýyn tekserip jatqan quzyrly organ joq. Paradoks pa?
«Artsport»-qa jumsalyp jatqan qarjynyń bir bóligin mádenıet úıi men jasóspirimder saraıynyń jabdyqtaryn jańartýǵa, oqytýshylardyń jalaqysyn kóterýge nege bólmeske? Án-kúı, bı úıirmelerin «Artsport»-tan alyp, memlekettik mekemelerge berý kerek. Bıýdjet qarjysyn únemdeý degen – osy.
«Artsport»-tyń qarjysyn basseın, taǵy basqa balamasy joq úıirmelerdi ashýǵa jumsasa eken. Ári «Artsport»-qa qarjy qarastyrylǵanda aýyl men qalaǵa bólinetin qarjynyń tepe-teńdigin saqtaý qajet. Memleket balalardy damytýǵa qarjy bólip jatyr. Alaıda ol aýyl balalaryna jetken joq. Aımaqtarda «Artsport»-qa jumsalǵan qarjynyń 80 paıyzy qalada qalady. Sebebi monıtorıng jasap jatqan eshkim joq.
Lázzat QOJAHMET,
«Qaraǵandy qalasyndaǵy otbasyn qoldaý ortalyǵy» KMM basshysy
