500 metr qashyqtyqqa aıdyn ústinde júıtkigen júırikter arasynda Denıstiń tarıhı medal oljalap, ánuranymyzdy shyrqatýyna múmkindik te boldy. Sóreden attanǵanda topty bastaǵan kanadalyq sportshy Stıven Dıýbýany ókshelep otyrdy. Tipti bir-eki ret burylysta aldyn orap, kósh basyna da shyǵyp myqtylyǵyn kórsetti. Biraq márege jaqyndaǵanda sańlaq Stıven qarqynǵa qarqyn qosyp, álem chempıony atandy. Qola medal nıderlandtyq Iens Van Tvaýtqa buıyrdy.
– Álem chempıonatynyń kúmis júldesi az tabys emes. Qýanyshymdy sózben jetkize almaspyn. Bul – bizdiń komandanyń ortaq jeńisi. Bıylǵy maýsymda qanshama kedergini eńserdik, óte aýyr maýsym boldy. Byltyrǵy jaz mezgilinen bastalǵan tynymsyz jattyǵýda tógilgen terdiń óteýine buıyrǵan kúmis júlde bul. Maqsatymyz – kelesi jyly ótetin qysqy Olımpıada dodasynan medal oljalaý. Bıylǵy jyldyń qysqy maýsymyn sátti qorytyndyladyq. Aqpanda qysqy Azııa oıyndarynda komandalyq saıysta altyn medal buıyrdy. Endi, mine, álem chempıonatynyń kúmisi enshimizge tıdi. Bizdi qoldaǵan qazaq eline, barsha jankúıerlerge alǵys aıtamyn, – dedi Denıs. Ol byltyr da álem chempıonatynyń fınaldyq saıysynda baǵyn synap, kúmis júldeger atandy. Jalpy, eresekter arasynda elimizden jahandyq dodanyń medalin ıelengen tuńǵysh sportshy da D.Nıkısha.
Erler arasynda Ádil Ǵalııahmetov te fınalǵa shyǵyp, 1000 metrge júgirýde 7-oryndy mise tutty. Áıelder quramasy da fınaldyq kezeńge ótkenimen, júldege synyq súıem jetpeı toqtady. Iаna Han, Málıka Ermek, Álına Ájǵalıeva, Olga Tıhonova tórttigi 4-oryndy qanaǵat tutty.
